ന്യൂഡല്‍ഹി| ആഗോളതലത്തില്‍ ലക്ഷം പേരില്‍ ഒരാള്‍ക്ക് എന്ന കണക്കില്‍ ഇന്ത്യയില്‍ കൊവിഡ് രോഗികളുടെ എണ്ണം കുറവെന്ന് കേന്ദ്ര ആരോഗ്യ മന്ത്രാലയം. രാജ്യത്ത് ഒരു ലക്ഷം പേരില്‍ 30.04 പേര്‍ക്ക് മാത്രമാണ് രോഗബാധ. എന്നാല്‍ ആഗോള ശരാശരി ഇതിന്റെ മൂന്നിരട്ടിയിലധികമാണ്. ആഗോളതലത്തില്‍ 114.67 പേര്‍ക്ക് രോഗമുണ്ടെന്നും ലോകാരോഗ്യ സംഘടനയുടെ റിപ്പോര്‍ട്ട് ഉദ്ധരിച്ച്‌ ആരോഗ്യ മന്ത്രാലയം വ്യക്തമാക്കി.

ലക്ഷം പേരില്‍ 671.24 കേസുകളാണ് യു എസിലുള്ളത്. ജര്‍മ്മനിയില്‍ 583.88, സ്‌പെയിന്‍ 526.22, ബ്രസീല്‍ 489.42 എന്നിങ്ങനെയാണ് കേസുകള്‍. കണക്കുകള്‍ പ്രകാരം കഴിഞ്ഞ 24 മണിക്കൂറിനുള്ളില്‍ ഇന്ത്യയില്‍ 14,821 കൊവിഡ് കേസുകളും, 445 മരണങ്ങളും റിപ്പോര്‍ട്ട് ചെയ്തതിനു പിന്നാലെ ഇന്ത്യയിലെ കൊവിഡ് കേസുകളുടെ എണ്ണം 425,282 ആയും മരണസംഖ്യ 13,699 ആയും ഉയരുകയും ചെയ്തു.

ആരോഗ്യ മന്ത്രാലയത്തിന്റെ റിപ്പോര്‍ട്ട് അനുസരിച്ച്‌ ഇന്ത്യയില്‍ നിലവില്‍ 173,384 രോഗബാധിതരാണുള്ളത്. 237,195 പേര്‍ രോഗമുക്തമായി. കഴിഞ്ഞ 24 മണിക്കൂറിനുള്ളില്‍ 9440 കൊവിഡ് രോഗികള്‍ രോഗമുക്തമായെന്നും ആരോഗ്യ മന്ത്രാലയം അറിയിച്ചു.