ന്യൂയോർക്ക്: ഇന്ത്യൻ മതന്യൂനപക്ഷ സമുദായങ്ങളോട് ഇന്ത്യ ഗവൺമെന്‍റിന്‍റെ സമീപനത്തിൽ ആശങ്കയറിയിച്ച് യുഎസ് സ്റ്റേറ്റ് ഡിപ്പാർട്ടുമെന്‍റ് വീണ്ടും രംഗത്ത്. ഇന്ത്യയിൽ മതസ്വാതന്ത്ര്യത്തിനു നേരെയുള്ള ഭീഷണി ഞങ്ങളെ ആശങ്കാകുലരാക്കുന്നുവെന്ന് സ്റ്റേറ്റ് ഡിപ്പാർട്ട്മെന്‍റ് ഫോർ റിലീജിയസ് ഫ്രീഡം അംബാസഡർ സാം ബ്രൗൺബാക്ക് പറഞ്ഞു.
സാമുദായിക കലാപങ്ങളും ന്യൂനപക്ഷ സമുദായങ്ങൾക്കു നേരെയുള്ള അക്രമങ്ങളും ദൈനംദിനം വർധിച്ചു വരുന്നതായി ഞങ്ങളുടെ ശ്രദ്ധയിൽപെട്ടിട്ടുണ്ടെന്നും സാം ചൂണ്ടിക്കാട്ടി.വ്യത്യസ്ത മതവിഭാഗങ്ങളുമായി അവർ നേരിടുന്ന പ്രശ്നങ്ങളെ കുറിച്ച് ഇന്ത്യൻ ഭരണാധികാരികൾ സംസാരിക്കാൻ തയാറാകണമെന്നും അദ്ദേഹം ആവശ്യപ്പെട്ടു.
കോവിഡ് 19 മഹാമാരിയെ തുടർന്ന് യുഎസിൽ പോലും മതന്യൂനപക്ഷങ്ങൾക്കു നേരെ ചിലർ വിരൽ ചൂണ്ടുമ്പോൾ ഇന്ത്യയിൽ വ്യാപകമായി കൊണ്ടിരിക്കുന്ന ഈ മഹാമാരിക്ക് അവിടെയുള്ള മതന്യൂനപക്ഷങ്ങളെ പഴിചാരരുതെന്നും മഹാമാരിക്ക് അവരല്ല ഉത്തരവാദികൾ എന്നും സാം ബ്രൗൺ പറഞ്ഞു. ഇന്ത്യയിൽ ഇപ്പോൾ വേണ്ടത് രോഗം മൂലം ബുദ്ധിമുട്ടുന്നവർക്ക് ആവശ്യമായ ചികിത്സയും മരുന്നുകളും ഭക്ഷണവും ലഭ്യമാക്കുക എന്നതാണെന്നും അദ്ദേഹം ഓർമിപ്പിച്ചു.
