കുടുംബത്തോടൊപ്പമുള്ള മനോഹരമായ വീഡിയോ പങ്കുവെച്ച് നടൻ കുഞ്ചാക്കോ ബോബൻ. ഭാര്യ പ്രിയയ്ക്കും മകൻ ഇസഹാക്കിനുമൊപ്പമുള്ള വീഡിയോയാണ് കുഞ്ചാക്കോ ബോബൻ ഇൻസ്റ്റഗ്രാമിൽ പോസ്റ്റ് ചെയ്തത്.
കുഞ്ചാക്കോ ബോബനും പ്രിയയും മകനെ ലാളിക്കുന്നതാണ് വീഡിയോയിലുള്ളത്. പശ്ചാത്തലത്തിൽ കടലും കടൽപ്പാലവും കാണാം. അടുത്തിടെ ഓണാഘോഷത്തിനായി കുഞ്ചാക്കോ ബോബൻ മെൽബണിലെത്തിയിരുന്നു. അതിനിടയിൽ എടുത്ത വീഡിയോയാണിതെന്നാണ് സൂചന.
ഈ വീഡിയോക്ക് നടൻ നൽകിയ ക്യാപ്ഷനും സോഷ്യൽ മീഡിയയിൽ ചർച്ചയാകുകയാണ്. ‘എന്റെ പവർ ഗ്രൂപ്പ്’ എന്നാണ് ചാക്കോച്ചൻ കുറിച്ചത്. ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ ഏറെ ചർച്ചയായ വാക്കാണ് പവർ ഗ്രൂപ്പ്.
കുഞ്ചാക്കോ ബോബൻ അഭിനയിച്ച ‘മാംഗല്യം’ തന്തുനാനേന’ എന്ന ചിത്രത്തിന്റെ സംവിധായക സൗമ്യ സദാനന്ദൻ നേരത്തെ ഫെയ്സ്ബുക്കിൽ ഒരു പോസ്റ്റ് പങ്കുവെച്ചിരുന്നു. ഹേമ കമ്മിറ്റിക്ക് മുമ്പിൽ വ്യക്തമാക്കിയ കാര്യങ്ങൾ പൊതു ഇടത്തിൽ തുറന്നു പറയുന്നു എന്ന ആമുഖത്തോടെയായിരുന്നു സൗമ്യയുടെ പോസ്റ്റ്. സിനിമയിലെ നല്ല ആൺകുട്ടികൾക്കുപോലും മറ്റൊരു മുഖമുണ്ടെന്നും തന്റെ ആദ്യ സിനിമ അനുവാദമില്ലാതെ പ്രധാന നടനും സഹനിർമാതാവും എഡിറ്റ് ചെയ്തെന്നും സൗമ്യ ആരോപിച്ചിരുന്നു. പലരും സൗമ്യ സദാനന്ദന്റെ ഈ പോസ്റ്റുമായി ബന്ധപ്പെടുത്തിയാണ് ചാക്കോച്ചന്റെ വീഡിയോയ്ക്ക് താഴെ കമന്റ് ചെയ്തിരിക്കുന്നത്.
