ലോക്ക് ഡൗണിനെ തുടര്‍ന്ന് വിവിധ രാജ്യങ്ങളില്‍ കുടുങ്ങിക്കിടക്കുന്ന ഇന്ത്യക്കാര്‍ ഘട്ടം ഘട്ടമായി രാജ്യത്തേക്ക് മടങ്ങിയെത്തിക്കൊണ്ടിരിക്കുകയാണ്. അന്താരാഷ്ട്ര വിമാന സര്‍വീസുകള്‍ നി‍ത്തിവെച്ചതോടെ വന്ദേ ഭാരത്, സമുദ്ര സേതു തുടങ്ങിയ മിഷനുകളിലൂടെ വിദേശത്ത് നിന്നുള്ള ഇന്ത്യക്കാരെ നാട്ടിലേക്ക് തിരികെയെത്തിക്കുന്നത്. ഗള്‍ഫ് നാടുകളില്‍ നിന്ന് നിരവധി വിമാനങ്ങള്‍ ഇതുവരെ കേരളത്തിലെത്തിക്കഴിഞ്ഞു. വിമാന മാര്‍ഗം ഒഴിപ്പിക്കുന്ന വന്ദേ ഭാരത് പദ്ധതിക്ക് ഒപ്പം തന്നെ രണ്ട് ഘട്ടങ്ങളിലായി ഇന്ത്യന്‍ നാവികസേനയുടെ സമുദ്ര സേതു പദ്ധതി വഴിയും മാലി അടക്കമുള്ള പ്രദേശങ്ങളില്‍ നിന്ന് കൊച്ചിയില്‍ എത്തുയിട്ടുണ്ട്.
ഓപ്പറേഷന്‍ സമുദ്ര സേതുവിന്റെ ഭാഗമായുള്ള മൂന്നാം ദൗത്യത്തില്‍ 588 പേര്‍ കൊച്ചി തുറമുഖത്തെത്തി. നാവിക സേനയുടെ ഐ. എന്‍. എസ് ജലാശ്വയില്‍ കേരളം, തമിഴ്നാട്, തെലങ്കാന, ലക്ഷദ്വീപ് എന്നിവിടങ്ങളില്‍ നിന്നുള്ള യാത്രക്കാര്‍ ആണ് പ്രധാനമായി ഉണ്ടായിരുന്നത്. ഐ.എന്‍.എസ് ജലാശ്വയുടെ രണ്ടാമത്തെ ദൗത്യമാണിത്. യാത്രക്കാരില്‍ 70 പേര്‍ സ്ത്രീകളും 21 പേര്‍ കുട്ടികളുമാണ്. സ്ത്രീകളില്‍ ആറ് പേര്‍ ഗര്‍ഭിണികള്‍ ആണ്.
15 ന് മാലി തുറമുഖത്തു നിന്നും പുറപ്പെടേണ്ടിയിരുന്ന ഐ എന്‍. എസ് ജലാശ്വ മോശമായ കാലാവസ്ഥ കാരണം ഒരു ദിവസം വൈകിയാണ് യാത്ര ആരംഭിച്ചത്. ഓപ്പറേഷന്‍ സമുദ്ര സേതുവിന്റെ ഭാഗമായി 1488 പേരാണ് ഇതുവരെ കൊച്ചി തുറമുഖത്ത് എത്തിയത്. ആദ്യ ദിനം ഐ. എന്‍. എസ് ജലാശ്വയില്‍ 698 പേരും രണ്ടാം ദൗത്യമായ ഐ. എന്‍. എസ് മഗറില്‍ 202 യാത്രക്കാരുമാണ് ഉണ്ടായിരുന്നത്. സുരക്ഷാ പരിശോധനക്കും ആരോഗ്യ പരിശോധനക്കും ശേഷം കപ്പലില്‍ എത്തിയ യാത്രക്കാരെ അതാത് ജില്ലകളിലെ നിരീക്ഷണ കേന്ദ്രത്തിലാക്കും
ഓപ്പറേഷന്‍ സമുദ്ര സേതുവിന്റെ ഭാഗമായുള്ള ആദ്യ കപ്പല്‍ ഞായറാഴ്‍ചയാണ് കൊച്ചി തുറമുഖത്ത് എത്തിയത്. മാലദ്വീപില്‍ നിന്ന് ഉള്ള പ്രവാസി ഇന്ത്യക്കാരുമായാണ് ഇന്ത്യന്‍ നാവികസേനയുടെ ഐഎന്‍എസ് ജലാശ്വ എന്ന കപ്പല്‍ എത്തിയത്. 698 പേരാണ് ആദ്യകപ്പലില്‍ കൊച്ചിയില്‍ എത്തിയത്. 19 ഗര്‍ഭിണികളും 14 കുട്ടികളും അടക്കമുള്ളവരാണ് ആദ്യ സംഘത്തില്‍ ഉണ്ടായിരുന്നത്. ഇവര്‍ പരിശോനകള്‍ പൂര്‍ത്തിയാക്കിയ ശേഷം വിവിധ കേന്ദ്രങ്ങളില്‍ ക്വാറന്‍റൈനില്‍ പ്രവേശിച്ചു.
വിദേശത്ത് നിന്നും ഇതര സംസ്ഥാനങ്ങളില്‍ നിന്നും എത്തുന്ന പ്രവാസികളില്‍ പലര്‍ക്കും കൊവിഡ് 19 സ്ഥിരീകരിക്കുന്ന സ്ഥിതിയാണ് നിലവിലുള്ളത്. ഒരു ഘട്ടത്തില്‍ പോസ്റ്റീവ് കേസുകളുടെ എണ്ണത്തില്‍ സംസ്ഥാനം വലിയ അശ്വാസത്തിലേക്ക് നീങ്ങിയിരുന്നെങ്കിലും പ്രവാസികള്‍ തിരിച്ചെത്തി തുടങ്ങിയതോടെ രോഗികളുടെ എണ്ണത്തില്‍ വലിയ വര്‍ധനവാണ് ഉണ്ടാവുന്നത്. ഇന്നത്തെ കണക്കുകള്‍ കൂടി പുറത്ത് വന്നതോടെ സംസ്ഥാനത്ത് രോഗബാധിതരുടെ എണ്ണം വീണ്ടും 100 കടന്നു. അതുകൊണ്ട് തന്നെ പുറത്ത് നിന്ന് എത്തുന്നവരുടെ കാര്യത്തില്‍ വലിയ ശ്രദ്ധയാണ് നല്‍കുന്നത്.
