വാഷിങ്ടണ്‍: ലോകത്ത് ഏറ്റവും കൂടുതല്‍ കോവിഡ് കേസുകളും മരണങ്ങളും റിപ്പോര്‍ട്ട് ചെയ്തത് അമേരിക്കയിലാവാനുള്ള കാരണം വ്യക്തമാക്കി പ്രസിഡന്‍റ് ഡോണള്‍ഡ് ട്രംപ്. കോവിഡ് വ്യാപനം അമേരിക്കയില്‍ ശക്തമാകുന്നതിന് മുമ്ബ് തന്നെ കോവിഡ് ടെസ്റ്റുകള്‍ രാജ്യത്ത് ചെയ്തു തുടങ്ങിയിരുന്നതായി ട്രംപ് പറഞ്ഞു. രണ്ട് കോടിയോളം ടെസ്റ്റുകളാണ് രാജ്യത്ത് നടത്തിയത്. ‘കൂടുതല്‍ ടെസ്റ്റുകള്‍ നടത്തിയത് കൊണ്ട് കൂടുതല്‍ കേസുകള്‍ കണ്ടെത്തി. അതാണ് സംഭവിച്ചത്’. ഇതുപോലെ കൂടുതല്‍ ടെസ്റ്റുകള്‍ നടത്തിയിരുന്നുവെങ്കില്‍ ഇന്ത്യയിലും ചൈനയിലും അമേരിക്കയേക്കാളേറെ കേസുകള്‍ റിപ്പോർട്ട് ചെയ്തേനെ എന്നും ട്രംപ് അഭിപ്രായപ്പെട്ടു. വടക്ക് കിഴക്കൻ സംസ്ഥാനമായ മൈനിലെ മെഡിക്കൽ നിർമാണ ഫെസിലിറ്റിയിൽ വെച്ച് സംസാരിക്കുകയായിരുന്നു ട്രംപ്. ജർമനിയും ദക്ഷിണ കൊറിയയുമൊക്കെ യഥാക്രമം 40 ലക്ഷവും 30 ലക്ഷവും കോവിഡ് പരിശോധനകളാണ് നടത്തിയത്.
കൂടുതൽ ടെസ്റ്റ് നടത്തിയാൽ കോവിഡ് രോഗികളിൽ ചൈനയും ഇന്ത്യയും അമേരിക്കയെ മറികടക്കും -ട്രംപ്
