ബെംഗളൂരു: നേഹ ബിസ്‌വാൽ എന്ന സോഷ്യൽ മീഡിയ ഇൻഫ്ലിവൻസർക്ക് ബെംഗളൂരുവിൽ വെച്ചുണ്ടായ അനുഭവം നഗരത്തിലെ താമസക്കാരെ ഞെട്ടിച്ചിരിക്കുകയാണ്. തനിക്കു നേരെ നടന്ന ഒരു ലൈംഗികാക്രമണത്തെ കുറിച്ച് നേഹ സോഷ്യൽ മീഡിയയിലെത്തി വിവരിക്കുകയായിരുന്നു. സാധാരണ ലൈംഗികാക്രമണങ്ങളിൽ നിന്ന് വ്യത്യസ്തമായിരുന്നു നേഹയ്ക്കുണ്ടായ അനുഭവം. ഒരു പത്തുവയസ്സുകാരൻ പയ്യനായിരുന്നു ഈ സംഭവത്തിൽ ആക്രമണകാരി!
സോഷ്യൽ മീഡിയയിൽ കണ്ണീരോടെയാണ് നേഹ ബിസ്‌വാൽ തനിക്കുണ്ടായ ദുരനുഭവം വിവരിച്ചത്. ബിടിഎം ലേഔട്ടിൽ വെച്ചായിരുന്നു ആക്രമണം. ബിടിഎം ലേഔട്ടിലെ ഒരു റോഡരികിലൂടെ നടക്കുകയായിരുന്നു നേഹ. ദിവസവും ചെയ്യാറുള്ള വ്ലോഗിങ്ങിനു വേണ്ടി ക്യാമറയും ഓൺ ചെയ്ത് പിടിച്ചിരുന്നു. സംസാരിച്ച് നടന്നു വരുന്നതിനിടയിൽ പെട്ടെന്ന് എതിർവശത്തു നിന്ന് ഒരു ചെറിയ പയ്യൻ സൈക്കിളിൽ എത്തി. അവൻ കൈയും കലാശവും കാട്ടുന്നുണ്ടായിരുന്നു. ആദ്യം ‘Hi’ എന്ന് പറഞ്ഞ് അവൻ നേഹയെ സമീപിച്ചു. പെട്ടെന്ന് അവൻ നേഹയുടെ അടുത്തെത്തുകയും നെഞ്ചിൽ കയറിപ്പിടിക്കുകയുമായിരുന്നു.
അക്രമി ഈ കൃത്യം ചെയ്യുന്നതിന്റെ ദൃശ്യങ്ങൾ നേഹയുടെ ഫോണിൽ കൃത്യമായി പതിഞ്ഞിട്ടുണ്ട്. തനിക്ക് ബെംഗളൂരു നഗരത്തിൽ ജീവിക്കാൻ പേടി തോന്നുന്നതായി നേഹ പറയുന്നു. ഒട്ടും സുരക്ഷിതത്വം അനുഭവപ്പെടുന്നില്ല. ചെറിയ കുട്ടികൾ പോലും ലൈംഗികാക്രമണം നടത്തുകയാണ്. ഇത്തരമൊരു അനുഭവം തനിക്ക് മുമ്പൊരിക്കലും ഉണ്ടായിട്ടില്ല.
സംഭവത്തില്‍ ബെംഗളൂരു പോലീസ് സ്വമേധയാ കേസെടുത്തിട്ടുണ്ട്. ചില മാധ്യമ റിപ്പോർട്ടുകൾ പ്രകാരം സംഭവത്തിൽ ഒരു കുട്ടിയെ പോലീസ് പിടികൂടിയിട്ടുമുണ്ട്.
