റിയാദ്: അവസാന പരീക്ഷ കഴിഞ്ഞ് വീട്ടിലേക്ക് മടങ്ങിയ പതിമൂന്നുകാരൻ സൗദിയിൽ സ്കൂൾ ബസിനടയിൽപ്പെട്ട് മരിച്ചു. ബദര്‍ ബിന്‍ മുഹമ്മദ് അല്‍ ഹലാഫി എന്ന വിദ്യാർഥിയാണ് സ്‌കൂള്‍ ബസിൻ്റെ ഡോര്‍ തുറന്നു താഴേക്ക് വീണ് അപകടത്തിൽപ്പെട്ടത്. കുട്ടിയുടെ ശരീരത്തിലൂടെയാണ് ബസ് കയറിയിറങ്ങിയത്. അവധി ആഘോഷിക്കാൻ വീട്ടിലേക്ക് എത്തിയ കുട്ടിയുടെ ദാരുണമരണത്തിൻ്റെ ഞെട്ടലിൽ നിന്ന് സഹപാഠികളും അധ്യാപകരും മോചിതരായിട്ടില്ല.
ഗുരുതരമായി പരിക്കേറ്റ വിദ്യാർഥിയെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സംഭവസ്ഥലത്ത് വെച്ച് തന്നെ മരണം സംഭവിച്ചിരുന്നു. ബസിൻ്റെ വാതിൽ ശരിയായ രീതിയിൽ അടയാതിരുന്നതാണ് അപകടകാരണമെന്നാണ് റിപ്പോർട്ട്. എന്നാൽ ഇക്കാര്യത്തിൽ അധികൃതർ സ്ഥിരീകരണം നടത്തിയിട്ടില്ല.
ബദര്‍ തന്റെ അവസാന പരീക്ഷകള്‍ പൂര്‍ത്തിയാക്കി തന്റെ ശീതകാല അവധി ആഘോഷിക്കാന്‍ ആകാംക്ഷയോടെ കാത്തിരിക്കുകയായിരുന്നുവെന്ന് സുഹൃത്തുക്കള്‍ പറഞ്ഞു. ഉച്ചയ്ക്കു ശേഷമുള്ള പരീക്ഷ കഴിഞ്ഞ് വീട്ടിലേക്ക് മടങ്ങുമ്പോള്‍ മകന്‍ ബസിന്റെ വാതിലില്‍ ചാരി നില്‍ക്കുകയായിരുന്നു. ശരിയായ രീതിയില്‍ അടഞ്ഞിട്ടില്ലാത്ത വാതില്‍ യാത്രയ്ക്കിടെ പെട്ടെന്ന് തുറക്കുകയും വിദ്യാര്‍ഥി റോഡിലേക്ക് വീഴുകയുമായിരുന്നു. പരിക്കുകളോടെയെങ്കിലും രക്ഷപ്പെടുമായിരുന്ന ബദറിന്റെ ശരീരത്തിലേക്ക് ബസിന്റെ പിറകിലെ ടയറുകള്‍ കയറിയതോടെ തല്‍ക്ഷണം മരണം സംഭവിക്കുകയായിരുന്നു. മകന്റെ മരണത്തെക്കുറിച്ച് പറയുമ്പോള്‍ ബദറിന്റെ പിതാവിന് വാക്കുകള്‍ പൂർത്തിയാക്കാനായില്ല.
അവസാന പരീക്ഷാ ദിനത്തില്‍ ബസിലേക്ക് പോകുന്നതിന് മുൻപ് വരാനിരിക്കുന്ന അവധിക്കാലത്തെക്കുറിച്ചുള്ള ചിന്തയില്‍ സന്തോഷത്തോടെ നൃത്തം ചെയ്ത മകന്റെ ചിത്രമാണ് ആ പിതാവിന്റെ കണ്ണിലും മനസ്സിലും. ‘അവന് വളരെ സന്തോഷവാനായിരുന്നു. ഇടവേളയെക്കുറിച്ച് താന്‍ എത്രമാത്രം ആവേശഭരിതനാണെന്ന് പറഞ്ഞു. ‘ദൈവം നിങ്ങളെ അനുഗ്രഹിക്കുകയും സന്തോഷം നല്‍കുകയും ചെയ്യട്ടെ’ എന്ന് പറഞ്ഞുകൊണ്ട് ഞാന്‍ അവന് ആശംസകള്‍ നേര്‍ന്നു. അതാണ് മകനെ കുറിച്ചുള്ള എന്റെ അവസാന ഓര്‍മകള്‍’- ദുഖഭാരത്തോടെ പിതാവ് പറഞ്ഞു.
