മലപ്പുറം: തെരഞ്ഞെടുപ്പ് ചുമതല ഏറ്റെടുക്കാന് വിമുഖത കാണിക്കുന്ന സര്ക്കാര് ഉദ്യോഗസ്ഥര്ക്ക് മാതൃകയായി ഖദീജ. 69 വയസ്സ് പിന്നിട്ട ഇവര് തെരഞ്ഞെടുപ്പ് ജോലി ചോദിച്ചുവാങ്ങുകയായിരുന്നു. എല്.എസ്.ജി.ഡി എന്ജിനീയറിങ് വിഭാഗത്തിലെ പാര്ട്ട് ടൈം സ്വീപ്പറാണ്. പാര്ട്ട് ടൈം ജോലിക്കാര് 70ാം വയസ്സിലാണ് വിരമിക്കുന്നത്.
കൊണ്ടോട്ടി തുറക്കല് സ്വദേശിയായ ഇവര്ക്ക് വിരമിക്കാന് ആറുമാസം കൂടിയാണുള്ളത്. അതിനിടെയാണ് തെരഞ്ഞെടുപ്പ് ഡ്യൂട്ടി എത്തിയത്. വയസ്സും ആരോഗ്യവും ചൂണ്ടിക്കാട്ടി പിന്മാറാന് പലരും അറിയിച്ചപ്പോള് സധൈര്യം ചുമതല ഏറ്റെടുക്കുകയായിരുന്നു.
മലപ്പുറം നഗരസഭ 40ാം വാര്ഡിലെ പെരുമ്ബറമ്ബ് ഹിദായത്തുല് ഇസ്ലാം മദ്റസ ബൂത്തില് പോളിങ് അസിസ്റ്റന്റായാണ് ഡ്യൂട്ടി. സാനിറ്റൈസറും മറ്റു സഹായങ്ങളും നല്കുകയാണ് ജോലി. പത്താം ക്ലാസുവരെ പഠിച്ച ഇവര് 1993ല് മഞ്ചേരി മേലാക്കം പി.ഡബ്ല്യു.ഡി ഓഫിസിലാണ് ജോലിയില് പ്രവേശിച്ചത്.
ആദ്യമായാണ് തെരഞ്ഞെടുപ്പ് ജോലി ചെയ്യുന്നതെന്നും ഒരു ബുദ്ധിമുട്ടും ഇല്ലെന്നും ഖദീജ പറയുന്നു. ഓമാനൂര് ഒ.എം. വീട്ടില് ബീരാന് കുട്ടിയാണ് ഭര്ത്താവ്. റസിയ, ശാഹിദ, സറീന, മുഹമ്മദ് റാഫി എന്നിവര് മക്കളാണ്.