ചുവാൻഡോ ടാൻ എന്ന സെലിബ്രിറ്റി ഫോട്ടോ ഗ്രാഫറുടെ ഒരു ചിത്രം വർഷങ്ങൾക്ക് മുൻപ് വൈറലായിരുന്നു. ഇതാരാണെന്ന് ചികഞ്ഞ സോഷ്യൽ മീഡിയയെ ഞെട്ടിച്ചത് പക്ഷേ അയാളുടെ സൗന്ദര്യമായിരുന്നില്ല, മറിച്ച് പ്രായമായിരുന്നു. 58 വയസുള്ള യുവാവായിരുന്നു ചുവാൻഡോ ടാൻ. ഒന്നര ദശലക്ഷത്തോളം പേരാണ് ഇദ്ദേഹത്തെ ഇൻസ്റ്റഗ്രാമിൽ പിന്തുടരുന്നത്. കണ്ടാൽ 30 വയസിൽ കൂടുതൽ തോന്നത്ത ടാനിന്റെ ഡയറ്റും ആരോഗ്യ-സൗന്ദര്യ രഹസ്യങ്ങളാണ് ഓരോരുത്തർക്കും അറിയേണ്ടത്.
സിങ്കപ്പൂറുകാരനായ ചിത്രകാരൻ ടാൻ ടി ചീയുടെ ഇളയമകനായ ടാൻ 1980 കളിൽ മോഡലിംഗിലൂടെയാണ് കരിയറിന് തുടക്കമിടുന്നത്. നല്ല ജീനുകളുടെയും ആരോഗ്യകരമായ ജീവിതശൈലിയുടെയും സംയോജനമാണ് യൗവനത്തിന് പിന്നിലെന്നാണ് ടാനിന്റെ വാദം. ജാനറ്റ് ജാക്‌സൺ, റീത്ത ഓറ, ഷു ക്വി തുടങ്ങിയ സെലിബ്രിറ്റികൾക്കൊപ്പം പ്രവർത്തിച്ചിട്ടുള്ള ടാൻ ഏറെ പ്രശസ്തിയുള്ള ഫോട്ടോഗ്രാഫറാണ്. കഠിനമായ ഡയറ്റ് പിന്തുടരുന്ന ടാൻ വ്യായാമം മുടക്കാറേയില്ല.
പ്രാതലിന് വേവിച്ച ആറ് മുട്ടകൾ, കൊളസ്ട്രോൾ വരാതിരിക്കാൻ മഞ്ഞക്കരു ഒഴിവാക്കിയാകും കഴിക്കുക, അവക്കാഡോയും ബെറിയും തേനും ചിലപ്പോഴൊക്കെയുണ്ടാകും. ലഞ്ചിന് ആവിയിൽ വേവിച്ച ചിക്കനും റൈസും പിന്നെ ഗ്രിൽ ചെയ്ത പച്ചക്കറികളും മത്സ്യത്തിന്റെ സൂപ്പും. ഐസ്ക്രീം കഴിക്കുന്ന ടാൻ ചായയും കാപ്പിയും ഒഴിവാക്കി. കൂടുതൽ വെള്ളം കുടിക്കുന്നു.
