സംസ്ഥാനത്ത് രണ്ട് നിയമസഭ മണ്ഡലങ്ങളിലേക്കും വയനാട് ലോക്സഭ മണ്ഡലത്തിലേക്കുമുള്ള ഉപതിരഞ്ഞെടുപ്പ് പ്രഖ്യാപിച്ചതോടെ പ്രതീക്ഷകൾ പങ്കുവെച്ച് മുന്നണികൾ. വയനാടിന് പുറമെ ചേലക്കര, പാലക്കാട് നിയമസഭ മണ്ഡലങ്ങളിലുമാണ് ഉപതിരഞ്ഞെടുപ്പ് നടക്കുന്നത്. നവംബർ 13 നാണ് വോട്ടെടുപ്പ്. നവംബർ 23 നാണ് വോട്ടെണ്ണൽ.
28 ദിവസങ്ങൾ മാത്രമാണ് ഇനി തിരഞ്ഞെടുപ്പിനുള്ളത്. ഈ മാസം 25 വരെയാണ് നാമ നിർദേശ പത്രിക സമർപ്പിക്കാനുള്ള അവസാന തീയതി.
കേരളം ഉറ്റു നോക്കുന്ന പ്രധാന മത്സരം നടക്കുക പാലക്കാട് മണ്ഡലത്തിലാണ്. ഷാഫി പറമ്പിലിന് പിൻഗാമിയായി ആര് നിയമസഭയിലെത്തുമെന്നാണ് രാഷ്ട്രീയ കേരളം ഉറ്റു നോക്കുന്നത്. പ്രിയങ്കാ ഗാന്ധിയുടെ വരവോടെ വയനാട് ഇത്തവണയും ദേശീയ ശ്രദ്ധ ആകർഷിക്കും. കെ. രാധാകൃഷ്ണൻ ലോകസഭയിലേക്ക് പോയ ഒഴിവിലേക്ക് തിരഞ്ഞെടുപ്പ് നടക്കുന്ന ചേലക്കരയിൽ ഇത്തവണ ശക്തമായ ത്രികോണ മത്സരത്തിന് കളമൊരുങ്ങിയേക്കും.
