വയനാട്ടിലേത് അടിച്ചേൽപ്പിക്കപ്പെട്ട തിരഞ്ഞെടുപ്പെന്നും ജമാഅത്തെ ഇസ്‌ലാമിയുടെ പിന്തുണയുള്ള സ്ഥാനാർഥിയാണ് പ്രിയങ്ക ഗാന്ധിയെന്നും മുഖ്യമന്ത്രി പിണറായി വിജയൻ. വയനാട് മണ്ഡലം എൽ.ഡി.എഫ്. സ്ഥാനാർഥി സത്യൻ മൊകേരിയുടെ തിരഞ്ഞെടുപ്പു പ്രചാരണയോഗം മലപ്പുറം എടവണ്ണയിൽ ഉദ്ഘാടനം ചെയ്യുകയായിരുന്നു മുഖ്യമന്ത്രി.
കോൺഗ്രസ് നിലപാടും ജമാഅത്തെ ഇസ്‌ലാമി സ്വീകരിക്കുന്ന നിലപാടും എന്താണെന്നും അദ്ദേഹം ചോദിച്ചു. സിയോണിസവും ആർ.എസ്.എസും ഒരമ്മ പെറ്റ മക്കളാണ്. അതുകൊണ്ടാണ് ഇസ്രയേലിന്‍റെ ക്രൂരതയ്ക്ക് ബി.ജെ.പി.സർക്കാർ കൂട്ടുനിൽക്കുന്നത്. അമേരിക്കൻ സാമ്രാജ്യത്വത്തെ പ്രീണിപ്പിക്കുകയാണ് ലക്ഷ്യം. അമേരിക്കയുടെ കപ്പൽപ്പട നമ്മുടെ മണ്ണിൽ വിശ്രമിക്കാൻപോലും സാധ്യതയുണ്ട്. എന്നാൽ ഇതിനെതിരേ പ്രതിരോധമുയർത്താൻ കോൺഗ്രസ്സിന് കഴിയുന്നില്ല.
തന്‍റെ പ്രസംഗത്തിൽ ഖലീഫ ഭരണത്തെ അവഹേളിച്ചു എന്നായിരുന്നു ആരോപണമെന്നും മുഖ്യമന്ത്രി പറഞ്ഞു. ചില ഖലീഫമാർ നല്ല കാര്യങ്ങൾ ചെയ്തിട്ടുണ്ടാകും. അതുകൊണ്ട് ഖലീഫ ഭരണം വരണമെന്നാണോയെന്നും പിണറായി വിജയൻ ചോദിച്ചു. പ്രശ്നം ജനാധിപത്യത്തിന്റേതാണ്. ജനാധിപത്യമാണ് വേണ്ടത്. ജമാഅത്തെ ഇസ്‌ലാമി രാജ്യത്തിന്റെ ഭരണക്രമത്തെ മാനിക്കുന്നില്ല. അവർക്ക് ഒരു നയം മാത്രമേ ഉള്ളൂ. അത് ഇസ്‌ലാമിക ഭരണം സ്ഥാപിക്കലാണ്. ഇപ്പോൾ ജമാഅത്തെ ഇസ്‌ലാമിക്ക് യുഡിഎഫിനെ സഹായിക്കണമെന്ന് തോന്നുന്നു. ലീഗിന്റെ ദൗർബല്യം ജമാഅത്തെ ഇസ്‌ലാമി ഉപയോഗിക്കുന്നുവെന്നും മുഖ്യമന്ത്രി തുറന്നടിച്ചു.
