സാമുദായിക സംഘടനകളുമായുള്ള കോൺഗ്രസ് നേതാക്കളുടെ ഇടപെടലിൽ പ്രതികരിച്ച് കെ സുധാകരൻ. രമേശ് ചെന്നിത്തലയുടെ എൻഎസ്എസ് – എസ്എൻഡിപി നേതാക്കളുമായുള്ള കൂടിക്കാഴ്ചയ്ക്ക് പിന്നാലെ ഉയർന്ന ചർച്ചകളിലാണ് സുധാകരൻ്റെ പ്രതികരണം.
രമേശ് ചെന്നിത്തല ഇന്നലെ വന്ന നേതാവല്ലെന്നും വിദ്യാര്‍ഥി യൂണിയന്‍ കാലം മുതല്‍ക്കേ കോണ്‍ഗ്രസ് നേതൃത്വത്തിലുള്ള ആളാണെന്നും കെ.പി.സി.സി. അധ്യക്ഷന്‍ പറഞ്ഞു. മുഖ്യമന്ത്രിയാവാന്‍ കോണ്‍ഗ്രസ്സില്‍ എന്തുകൊണ്ടും യോഗ്യന്‍ രമേശ് ചെന്നിത്തലയാണെന്ന വെള്ളാപ്പള്ളിയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
സാമുദായിക നേതാക്കളുടെ വോട്ടുവാങ്ങാമെങ്കില്‍ അവര്‍ക്ക് അഭിപ്രായം പറഞ്ഞുകൂടെ എന്ന് അദ്ദേഹം ചോദിച്ചു. അഭിപ്രായങ്ങള്‍ പറയുന്നത് സ്വാഭാവികമാണ്. വെള്ളാപ്പള്ളിക്ക് പ്രസ്താവനകള്‍ നടത്താന്‍ അവകാശമുണ്ടോ എന്നുചോദിച്ചാല്‍ അവകാശമുണ്ട്. രമേശ് ചെന്നിത്തലയെ മുഖ്യമന്ത്രിയാക്കണം എന്ന് കോണ്‍ഗ്രസ്സിലെ ഉത്തരവാദിത്തപ്പെട്ട ആരെങ്കിലും പറഞ്ഞോയെന്നും പല പേരുകളും ഉയര്‍ന്നുവരുന്നത് സ്വാഭാവികമാണെന്നും അദ്ദേഹം പറഞ്ഞു.
