ഇന്ത്യയിൽ ഏറ്റവും കൂടുതൽ ട്രാഫിക് കുരുക്കുള്ള നഗരം എന്ന ദുഷ്പേര് ഇനി കൊൽക്കത്തയ്ക്ക്. ബെംഗ്ളൂരിനെ പിന്തള്ളിയാണ് കൊൽക്കത്ത ഈ സ്ഥാനം സ്വന്തമാക്കിയത്. ടോംടോം ട്രാഫിക് ഇൻഡെക്സ് 2024 റിപ്പോർട്ടിലാണ് ഇക്കാര്യം വ്യക്തമാക്കുന്നത്. രാജ്യത്തെ ട്രാഫിക് പ്രശ്നങ്ങൾക്ക് പരിഹാരം കാണാൻ പുതിയ റോഡുകളും ഹൈവേകളും എക്സ്പ്രസ് വേകളും നിർമ്മിക്കുമ്പോഴും ചില നഗരങ്ങൾ കടുത്ത ട്രാഫിക് കുരുക്കിൽ വലയുകയാണ്. അത്തരത്തിൽ ഗതാഗതക്കുരുക്കിൽ ശ്വാസം മുട്ടുന്ന നഗരങ്ങളിൽ ഒന്നാമതാണ് കൊൽക്കത്ത.
ബെംഗ്ളുറു അതിന്റെ ട്രാഫിക്കിന്റെ പേരിൽ കുപ്രസിദ്ധി നേടിയതാണ്. എന്നാൽ ടോംടോം ട്രാഫിക് ഇൻഡെക്സ് 2024 പ്രകാരം കൊൽക്കത്ത ഈ കാര്യത്തിൽ ബെംഗ്ളൂരിനെ മറികടന്നു. ഒരുകാലത്ത് ശാന്തമായ നഗരം എന്ന് അറിയപ്പെട്ടിരുന്ന കൊൽക്കത്ത ഇന്ന് ഇന്ത്യയിലെ ഏറ്റവും കൂടുതൽ ട്രാഫിക് ഉള്ള നഗരമായി മാറിയിരിക്കുന്നു. റിപ്പോർട്ട് അനുസരിച്ച് കൊൽക്കത്തയിൽ വാഹനങ്ങൾ വളരെ കുറഞ്ഞ വേഗതയിലാണ് സഞ്ചരിക്കുന്നത്. ട്രാഫിക് കുരുക്ക് ഇവിടെ പതിവ് കാഴ്ചയാണ്. നഗരത്തിലെ പഴയ റോഡുകൾ, ഇടുങ്ങിയ വഴികൾ, വർദ്ധിച്ചുവരുന്ന ജനസംഖ്യ എന്നിവയെല്ലാം ഈ അവസ്ഥയ്ക്ക് കാരണമാകുന്നു.
ബെംഗ്ളുറു നഗരവും സമാനമായ ട്രാഫിക് പ്രശ്നങ്ങൾ നേരിടുന്നുണ്ട്. കടുത്ത ട്രാഫിക് കുരുക്ക്, ട്രാഫിക് ലൈറ്റുകളിൽ ദീർഘനേരം കാത്തിരിപ്പ്, ലക്ഷ്യസ്ഥാനത്ത് എത്താൻ വൈകൽ എന്നിവയെല്ലാം ബെംഗ്ളൂരിൽ സാധാരണമാണ്. പഴയ അടിസ്ഥാന സൗകര്യങ്ങളും അതിവേഗത്തിലുള്ള നഗരവൽക്കരണവും സ്ഥിതി കൂടുതൽ വഷളാക്കുന്നു.
ബെംഗ്ളുറു, കൊൽക്കത്ത തുടങ്ങിയ നഗരങ്ങളിലെ ട്രാഫിക് കുരുക്കിന് നിരവധി കാരണങ്ങളുണ്ട്. വർദ്ധിച്ചുവരുന്ന ജനസംഖ്യ, വാഹനങ്ങളുടെ എണ്ണത്തിലെ വർദ്ധനവ്, മതിയായ പൊതുഗതാഗത സംവിധാനങ്ങളുടെ കുറവ് എന്നിവ പ്രധാന കാരണങ്ങളാണ്. കൂടാതെ റോഡ് നിർമ്മാണത്തിലെയും വികസന പദ്ധതികളിലെയും കാലതാമസം ട്രാഫിക് കൂടുതൽ രൂക്ഷമാക്കുന്നു.
ടോംടോം ട്രാഫിക് ഇൻഡെക്സ് 2024
ടോംടോം ട്രാഫിക് ഇൻഡെക്സ് 2024, 62 രാജ്യങ്ങളിലെ 500 നഗരങ്ങളിലെ ട്രാഫിക് അവസ്ഥയെക്കുറിച്ചുള്ള വിവരങ്ങൾ നൽകുന്നു. യാത്രാ സമയം, തിരക്ക്, ഇത് യാത്രക്കാരെ എങ്ങനെ ബാധിക്കുന്നു തുടങ്ങിയ കാര്യങ്ങളെക്കുറിച്ചും റിപ്പോർട്ടിൽ പറയുന്നു. ടൈംസ് ഓഫ് ഇന്ത്യയുടെ റിപ്പോർട്ട് അനുസരിച്ച്, ഇൻ-കാർ നാവിഗേഷൻ സിസ്റ്റം അല്ലെങ്കിൽ ഫോണുകൾ വഴിയുള്ള ഡാറ്റ ഉൾപ്പെടെ 600 ദശലക്ഷത്തിലധികം കണക്റ്റഡ് ഉപകരണങ്ങൾ ഉപയോഗിച്ചാണ് ഡാറ്റ ശേഖരിക്കുന്നത്.
