പൃഥ്വിരാജിനെപ്പോലെ തന്നെ പ്രേക്ഷകര്‍ക്ക് പ്രിയപ്പെട്ടതാണ് സുപ്രിയ മേനോനും അലംകൃതയും. അഭിനയിക്കാതെ തന്നെ താരമായി മാറുകയായിരുന്നു ഇവര്‍. ഇവരുടെ വിശേഷങ്ങളെല്ലാം പെട്ടെന്ന് തന്നെ വൈറലായി മാറാറുണ്ട്. പിറന്നാളുകാരനായ പൃഥ്വിക്ക് സിനിമാലോകവും പ്രേക്ഷകരും ആശംസകള്‍ അറിയിച്ചിരുന്നു. കഴിഞ്ഞ ദിവസം മുതലേ തന്നെ ബര്‍ത്ത് ഡേ പോസ്റ്റുകള്‍ ഫാന്‍സ് പേജുകളിലൂടെ പ്രചരിക്കുന്നുണ്ടായിരുന്നു. നിമിഷനേരം കൊണ്ടായിരുന്നു പോസ്റ്റുകളെല്ലാം ശ്രദ്ധ നേടിയത്. ഇത്തവണത്തെ പിറന്നാളാഘോഷം എവിടെയാണെന്നായിരുന്നു ആരാധകരുടെ ചോദ്യങ്ങള്‍. പിറന്നാള്‍ കേക്ക് സഹിതമായി ആശംസ അറിയിച്ചിരിക്കുകയാണ് സുപ്രിയ മേനോന്‍.
ഹാപ്പി ബര്‍ത്ത് ഡേ പി, ഇനിയും ഒന്നിച്ച് ഒത്തിരി പിറന്നാള്‍ ഒന്നിച്ച് ആഘോഷിക്കാന്‍ കഴിയട്ടെ. കേക്ക് കഴിച്ചും മനോഹരമായ ഓര്‍്മ്മകളും ഉണ്ടാവട്ടെ. നിങ്ങളാണ് ഞങ്ങളുടെ ജീവിതത്തിലെ യഥാര്‍ത്ഥ ഗോട്ട്. ലവ് യൂ എന്നായിരുന്നു സുപ്രിയ ആദ്യം കുറിച്ചത്. പൃഥ്വിക്കൊപ്പം ചേര്‍ന്ന് നിന്നുള്ള ഫോട്ടോയും കുറിപ്പിനൊപ്പമുണ്ടായിരുന്നു. നിമിഷനേരം കൊണ്ട് തന്നെ കുറിപ്പും ചിത്രവും വൈറലായിരുന്നു. നിങ്ങള്‍ രണ്ടുപേരും അവിടെ മുംബൈയില്‍ ഇരുന്ന് ആഘോഷിക്ക്, ഞങ്ങള്‍ ഇവിടെ കുറച്ച് വെല്‍ഫെയര്‍ പരിപാടികള്‍ ചെയ്യട്ടെയെന്നായിരുന്നു ആരാധകന്റെ കമന്റ്.
ലോകം മുഴുവനും നിങ്ങളെ ആഘോഷിക്കുമ്പോള്‍ ഞങ്ങളും അതിനൊപ്പം ചേരുന്നു. എല്ലാ ദിവസവും ഇങ്ങനെയാക്കാനായാണ് ഞങ്ങള്‍ ശ്രമിക്കുന്നത് ഹാപ്പി ബര്‍ത്ത് ഡേ ഡാഡ എന്നായിരുന്നു രണ്ടാമത്തെ പോസ്റ്റ്. പൃഥ്വിയുടെ ഫോട്ടോ പകര്‍ത്തുന്നതിന്റെ ചിത്രവും, അലംകൃതയും പൃഥ്വിയും സംസാരിച്ചിരിക്കുന്നതിന്റെ ഫോട്ടോയുമെല്ലാം ഈ പോസ്റ്റിനൊപ്പമുണ്ടായിരുന്നു. ഡാഡയ്‌ക്കൊപ്പം ലൊക്കേഷനിലെത്തിയ അലംകൃത കാര്യമായിത്തന്നെ എന്തോ പറയുന്നുണ്ടല്ലോയെന്നായിരുന്നു കമന്റുകള്‍.
അലംകൃത വന്നതോടെയാണ് താന്‍ കൂടുതല്‍ ക്ഷമ പഠിച്ചതെന്ന് മുന്‍പ് പൃഥ്വി തുറന്നുപറഞ്ഞിരുന്നു. ടിവി റിമോട്ടിന് വരെ തല്ലുകൂടുമായിരുന്നു മുന്‍പ്. അവളോട് അത് പറ്റില്ലല്ലോ. അങ്ങനെയാണ് ക്ഷമ പഠിച്ചത്. ഞാന്‍ നടനും സംവിധായകനുമാണെന്ന് അറിയാമെങ്കിലും വെക്കേഷന്‍ സമയത്ത് ഡാഡ സിനിമ ചെയ്യേണ്ടെന്നാണ് അവള്‍ പറയാറുള്ളത്. ഞാന്‍ ചെയ്തതില്‍ ഇതുവരെ ഒരു സിനിമയും അവളെ കാണിച്ചിട്ടില്ല. എനിക്ക് കാണാന്‍ പറ്റുന്ന തരത്തിലുള്ള സിനിമകള്‍ ചെയ്യാമോയെന്ന് അവള്‍ എന്നോട് ചോദിക്കാറുണ്ടെന്നും പൃഥ്വി മുന്‍പ് പറഞ്ഞിരുന്നു.
സെലിബ്രിറ്റി ലൈഫില്‍ നിന്നും മാറി സാധാരണക്കാരിയായി മകളെ വളര്‍ത്താനാണ് ആഗ്രഹം. ഞാനായിട്ട് അവളോട് സിനിമയില്‍ വരാന്‍ ആവശ്യപ്പെടില്ല. അവള്‍ ആരാവരുത് എന്ന കാര്യത്തെക്കുറിച്ച് മാത്രം എനിക്ക് ധാരണയുണ്ടെന്നുമായിരുന്നു പൃഥ്വി പറഞ്ഞത്. കൊച്ചുമക്കളുടെ കൂട്ടത്തിലെ കുസൃതിക്കാരിയെക്കുറിച്ച് വാചാലയായുള്ള അമ്മൂമ്മയുടെ അഭിമുഖങ്ങളും വൈറലാവാറുണ്ട്. അച്ഛമ്മ എപ്പോഴാണ് ഇങ്ങോട്ടേക്ക് വരുന്നതെന്നൊക്കെ ചോദിച്ച് അലംകൃത വിളിക്കാറുണ്ടെന്ന് മല്ലിക സുകുമാരന്‍ പറഞ്ഞിരുന്നു.
