ഡോ. ജോര്‍ജ് എം. കാക്കനാട്
ഹൂസ്റ്റണ്‍: യുഎസും കാനഡയും തമ്മിലുള്ള താരിഫ് തര്‍ക്കം ചൂടുപിടിക്കുകയാണ്. 25 ശതമാനം താരിഫ് ഏര്‍പ്പെടുത്തിയതോടെ കാനഡയില്‍ അക്ഷരാര്‍ത്ഥത്തില്‍ യുഎസിനെതിരേ രോഷം തിളയ്ക്കുകയാണ്. യുഎസിന്റെ 51 ാം സംസ്ഥാനമാകാനുള്ള ക്ഷണവും വിപരീത ഫലമാണ് ഉളവാക്കുന്നത്. യുഎസിനോടുള്ള കാനഡയുടെ രോഷം ഫലത്തില്‍ ടെസ്ല ഉടമയും ട്രംപിന്റെ ‘ഫ്രണ്ട് നമ്പര്‍ 1’ ഇലോണ്‍ മസ്‌കിനാകും തിരിച്ചടിയാകുക എന്നാണ് പൊതുവേ വിലയിരുത്തപ്പെടുന്നത്.
കാനഡയുടെ മുന്‍ ധനമന്ത്രിയും നിലവിലെ ലിബറല്‍ പാര്‍ട്ടി നേതൃത്വ മത്സരാര്‍ത്ഥിയുമായ ക്രിസ്റ്റിയ ഫ്രീലാന്‍ഡ് ധീരമായ പ്രതിരോധ നടപടി നിര്‍ദ്ദേശിച്ചു രംഗത്തുവന്നത് ഇതിന്റെ സൂചനയിലേക്കാണ് വിരല്‍ ചൂണ്ടുന്നത്. പ്രസിഡന്റ് ട്രംപിന്റെ കനേഡിയന്‍, മെക്‌സിക്കന്‍ ഇറക്കുമതികള്‍ക്ക് ഏര്‍പ്പെടുത്തിയ ഭീഷണിക്ക് നേരിട്ടുള്ള പ്രതികരണമായി ടെസ്ലകള്‍ ഉള്‍പ്പെടെയുള്ള തിരഞ്ഞെടുത്ത അമേരിക്കന്‍ ഉല്‍പ്പന്നങ്ങള്‍ക്ക് 100% തീരുവ ചുമത്തുക എന്നതാണ് അവര്‍ ആവശ്യപ്പെട്ടിരിക്കുന്നത്.
ദി കനേഡിയന്‍ പ്രസിന് നല്‍കിയ അഭിമുഖത്തില്‍, ഫ്രീലാന്‍ഡ് തന്റെ ഉദ്ദേശ്യങ്ങള്‍ വ്യക്തമാക്കി. ‘നമ്മള്‍ വളരെ ലക്ഷ്യം വച്ചുള്ളവരായിരിക്കണം, വളരെ സര്‍ജിക്കല്‍ ആയിരിക്കണം, വളരെ കൃത്യതയുള്ളവരായിരിക്കണം,’ അവര്‍ പറഞ്ഞു. തന്ത്രം സാമ്പത്തിക പ്രതികാരം മാത്രമല്ല അത് വ്യക്തിപരവും ആയിരിക്കണം എന്നും അവര്‍ ആവശ്യപ്പെടുന്നു. ട്രംപിന് ടെസ്ല സിഇഒ എലോണ്‍ മസ്‌ക് സാമ്പത്തികമായും പ്രവര്‍ത്തനപരമായും പിന്തുണ നല്‍കിയതില്‍ നിന്നാണ് ടെസ്ലയുടെ ഉള്‍പ്പെടുത്തല്‍ നിര്‍ദേശഇക്കുന്നത്.
‘ആരാണ് ട്രംപിനെ പിന്തുണയ്ക്കുന്നതെന്നും കാനഡയ്ക്കെതിരായ താരിഫ് ആക്രമണത്തിന് അവരെ എങ്ങനെ വില നല്‍കാന്‍ പ്രേരിപ്പിക്കാമെന്നും നമ്മള്‍ പരിശോധിക്കേണ്ടതുണ്ട്.’- ഫ്രീലാന്‍ഡ് ആവശ്യപ്പെടുന്നു. കാനഡയില്‍ വില്‍ക്കുന്ന ടെസ്ലയുടെ ഇലക്ട്രിക് വാഹനങ്ങള്‍ പ്രധാനമായും യുഎസിലും ചൈനയിലും നിര്‍മ്മിക്കപ്പെടുന്നതാണ്. താരിഫ് ചുമത്തുന്നതോടെ അവയുടെ വില വര്‍ദ്ധിപ്പിക്കും.
ഇത് കനേഡിയന്‍ ഇവി വാങ്ങുന്നവരെ മറ്റ് വാഹന നിര്‍മ്മാതാക്കളിലേക്ക് നയിക്കും. കാനഡയുടെ ഇലക്ട്രിക് വാഹന വിപണിയില്‍ ആധിപത്യം പുലര്‍ത്തുന്ന ടെസ്ലയ്ക്ക് ഇത് ഒരു വലിയ തിരിച്ചടിയാകാം, കാരണം അവരുടെ മോഡല്‍ വൈ, മോഡല്‍ 3 എന്നിവയാണ് കാനഡയില്‍ വില്‍പ്പനയില്‍ മുന്നില്‍ നില്‍ക്കുന്നത്.
ട്രംപിന്റെ സാമ്പത്തിക ഭീഷണികള്‍ കൈകാര്യം ചെയ്യുന്നതിലെ അഭിപ്രായവ്യത്യാസങ്ങളെത്തുടര്‍ന്ന് കഴിഞ്ഞ വര്‍ഷം ധനമന്ത്രി സ്ഥാനം രാജിവച്ച ഫ്രീലാന്‍ഡ്, ഇപ്പോള്‍ ഈ വിഷയം തന്റെ നേതൃത്വ പ്രചാരണത്തിനായി ഉപയോഗിക്കുന്നു. ”ട്രംപ് ഭരണകൂടത്തിന്റെ സവിശേഷതകളിലൊന്ന് അവര്‍ അനിശ്ചിതത്വത്തില്‍ വ്യാപാരം നടത്താന്‍ ഇഷ്ടപ്പെടുന്നു എന്നതാണ്,” അവര്‍ അഭിപ്രായപ്പെട്ടു.
”യുഎസില്‍ (ഭരണകൂടം) ആഭ്യന്തര ചര്‍ച്ചകള്‍ നടക്കുന്നതിനെക്കുറിച്ച് ധാരാളം റിപ്പോര്‍ട്ടുകള്‍ ഉണ്ട്. അതിനാല്‍ നമുക്ക് അത് നമ്മുടെ നേട്ടത്തിനായി ഉപയോഗിക്കാം. നമുക്ക് ചില കാര്യങ്ങള്‍ തീരുമാനിക്കാം, അവ നമ്മെ ബാധിച്ചാല്‍, നമ്മള്‍ അവരെ തിരിച്ചടിക്കുമെന്ന് വളരെ വ്യക്തമായി പറയാം.”- അവര്‍ വ്യക്തമാക്കുന്നു.
കാനഡയുടെ നീക്കം യുഎസിനുള്ള അപകടസാധ്യതകള്‍ കൂടുതലാണ്. കാനഡയുടെ ഇലക്ട്രിക് വാഹന പരിവര്‍ത്തന നിരക്ക് യുഎസിനെ മറികടക്കുന്നതാണ്. കാനഡയില്‍ 2024 ലെ മൂന്നാം പാദത്തില്‍ വിറ്റഴിക്കപ്പെട്ട പുതിയ കാറുകളുടെ ഏകദേശം 17% പൂര്‍ണ്ണമായും ഇലക്ട്രിക് ആണ്. യുഎസില്‍ ഇത് വെറും 8% മാത്രമാണ്. ക്യൂബെക്കിന്റെ ഇലക്ട്രിക് വാഹന പ്രോത്സാഹന നയങ്ങള്‍ ഈ വളര്‍ച്ചയ്ക്ക് ആക്കം കൂട്ടുന്നതാണ്.
ട്രംപിന്റെ നയങ്ങള്‍ അതിര്‍ത്തികള്‍ കടന്ന് വ്യാപിക്കുമ്പോള്‍, കാനഡയുടെ പ്രതികരണം ഇനി നയതന്ത്ര മാര്‍ഗങ്ങളില്‍ മാത്രം ഒതുങ്ങുന്നില്ല എ്‌ന സൂചനയാണ് ലഭിക്കുന്നത്. അദ്ദേഹത്തിന്റെ രാഷ്ട്രീയ സംവിധാനങ്ങളുമായി ബന്ധപ്പെട്ട ബിസിനസുകളെ അവര്‍ നേരിട്ട് ലക്ഷ്യം വയ്ക്കാനുള്ള സാധ്യതയാണുള്ളത്. ആ പ്രതികാര നടപടിയുടെ മുന്‍പന്തിയില്‍ ടെസ്ലയുണ്ട് എന്നത് മസ്‌കിന് ഒട്ടും ഗുണകരമാകില്ല.
