നിർമ്മാതാവും നടിയുമായ സാന്ദ്ര തോമസിൻ്റെ പരാതിയിൽ സംവിധായകൻ ബി ഉണ്ണികൃഷ്ണൻ, സിനിമാ നിർമാതാവ് ആന്റോ ജോസഫ് എന്നിവർക്കെതിരെ പോലീസ് കേസ്.
പൊതുമധ്യത്തിൽ അപമാനിച്ചു എന്ന പരാതിയിലാണ് കേസ്.
മലയാള സിനിമയിലെ സ്ത്രീകൾ അനുഭവിക്കുന്ന പ്രശ്നങ്ങളെ കുറിച്ച് പഠിക്കാൻ നിയോഗിച്ച ഹേമ കമ്മറ്റിക്ക് മുന്നിൽ മൊഴി നൽകിയതിന്റെ പേരിൽ നടപടിയെടുത്തു എന്നും പരാതിയിൽ പറയുന്നു.
ഇതിൻ്റെ പേരിൽ ഫെഫ്ക പ്രസിഡൻ്റ് ബി.ഉണ്ണികൃഷ്ണൻ പകയോടെ നടപടിയെടുത്തുവെന്നും സിനിമയിൽ നിന്നും ഒഴിവാക്കി നിർത്തിയെന്നും സാന്ദ്ര തോമസ് പറയുന്നു.
കോടതിയുടെ നിർദ്ദേശ പ്രകാരം സാന്ദ്രയുടെ പരാതിയിൽ എറണാകുളം സെൻട്രൽ പോലീസ് ആണ് കേസെടുത്തത്.
ബി.ഉണ്ണികൃഷ്ണൻ തൊഴിൽ മേഖലയിൽ നിന്നും മാറ്റി നിർത്തി, സാന്ദ്രാ തോമസിനോട് സഹകരിക്കരുതെന്ന് മറ്റുളളവരോട് ആവശ്യപ്പെട്ടു, തൊഴിൽ സ്വാതന്ത്രത്തിന് തടസം നിന്നു എന്നു തുടങ്ങിയ കാര്യങ്ങളും പരാതിയിൽ പറയുന്നു.
കുറച്ചുനാളുകൾക്ക് മുൻപ് നിർമാതാക്കളുടെ സംഘടനയേയും സാന്ദ്ര തോമസ് രൂക്ഷമായി വിമര്‍ശിച്ചിരുന്നു.
സാന്ദ്ര തോമസിൻ്റെ പരാതിയിൽ പ്രൊഡ്യൂസേഴ്സ് അസോസിയേഷൻ ഭാരവാഹികൾക്കെതിരെയും പൊലീസ് നേരത്തെ കേസെടുത്തിരുന്നു.
സിനിമയുടെ തർക്ക പരിഹാരവുമായി ബന്ധപ്പെട്ട യോഗത്തിൽ ലൈംഗികാധിക്ഷേപം നേരിട്ടെന്നായിരുന്നു അന്ന് സാന്ദ്ര തോമസ് പരാതിപ്പെട്ടത്.
ഇതിനു പിന്നാലെ സംഘടനയുടെ സൽപ്പേരിന് കളങ്കം ഉണ്ടാക്കിയെന്ന കാരണത്തിൽ നിര്‍മാതാക്കളുടെ സംഘടനയില്‍ നിന്ന് സാന്ദ്രയെ പുറത്താക്കി.
ഇതിനെതിരെ സാന്ദ്ര തോമസ് കോടതിയിൽ പോവുകയും നടപടി സ്റ്റേ ചെയ്യുകയും ചെയ്തിരുന്നു.
