കാൻബറ: 2025 ജനുവരി മുതൽ സ്റ്റുഡൻ്റ് വിസാ നിയമങ്ങളിൽ അടിമുടി മാറ്റം കൊണ്ടുവന്നിരിക്കുകയാണ് ഓസ്‌ട്രേലിയ. ഓസ്ട്രേലിയൻ ഡിപ്പാർട്ടമെന്റ് ഓഫ് ഹോം അഫേഴ്സാണ് വിസാ നിയമത്തിൽ മാറ്റം പ്രഖ്യാപിച്ചത്. വിസയ്ക്ക് അപേക്ഷിക്കുമ്പോൾ വിദ്യാർഥികൾ ഇനി ഓഫർ ലെറ്റർ മാത്രം സമർപ്പിച്ചാൽ പോരാ, കൺഫർമേഷൻ ഓഫ് എൻറോൾമെൻ്റ് കൂടി സമർപ്പിക്കണം എന്നതാണ് മാറ്റം.
2025 ജനുവരിക്ക് ശേഷം സമർപ്പിച്ച അപേക്ഷകൾക്കാണ് ഇപ്പോഴത്തെ തീരുമാനം ബാധകമാകുക. അർഹരായ വിദ്യാർഥികൾക്ക് അവസരം നൽകാൻ വേണ്ടിയാണ് വിസാ നിയമങ്ങൾ പരിഷ്കരിക്കുന്നതെന്നാണ് പുറത്തുവരുന്ന റിപ്പോർട്ടുകളിൽ വ്യക്തമാക്കുന്നത്. ഇതുവഴി സ്റ്റുഡൻ്റ് വിസയുടെ ദുരുപയോഗം തടയാൻ കഴിയുമെന്നാണ് അധികൃതരുടെ വിലയിരുത്തൽ.
മുൻ വർഷങ്ങളിൽ യൂണിവേഴ്സിറ്റികൾ നൽകിയിരുന്ന ഓഫർ ലെറ്റർ മാത്രമായിരുന്നു വിസയ്ക്കുള്ള മാനദണ്ഡം. സ്റ്റുഡൻ്റ് വിസയിലൂടെ കുറച്ചു വിദ്യാർഥികൾ രാജ്യത്തേയ്ക്ക് പ്രവേശിക്കുകയും പഠനം ഉപേക്ഷിച്ച് മറ്റു മേഖലകളിൽ തുടരുന്നതായും അധികൃതരുടെ ശ്രദ്ധയിൽ പെട്ടിരുന്നു. ഇത് മൂലമാണ് പുതിയ തീരുമാനം നടപ്പിലാക്കുന്നത്.
എന്താണ് കൺഫർമേഷൻ ഓഫ് എൻറോൾമെൻ്റ് (സിഒഇ)
ഓസ്‌ട്രേലിയയിലെ വിദ്യാഭ്യാസ സ്ഥാപനങ്ങൾ കുട്ടികൾക്ക് നൽക്കുന്ന ഔദ്യോഗിക ഇലക്ട്രോണിക് രേഖയാണ് കൺഫർമേഷൻ ഓഫ് എൻറോൾമെൻ്റ് (സിഒഇ). വിദ്യാർഥികൾ അവരുടെ പഠനത്തിന് ആവശ്യമായ ട്യൂഷൻ ഫീസ് യൂണിവേഴ്സിറ്റികൾക്ക് അടച്ച് സീറ്റ് ഉറപ്പാക്കണം. അതിനു ശേഷം മാത്രമേ സിഒഇ ലഭ്യമാകൂ. ഇതിൽ വിദ്യാർഥികളുടെ പേരുവിവരങ്ങൾ, പഠിക്കുന്ന കോഴ്സ്, പഠന കാലാവധി, ചെലവുകൾ എന്നിവ കൃത്യമായി രേഖപ്പെടുത്തും.
വിസാ അപേക്ഷകളിൽ വരുന്ന മാറ്റങ്ങൾ
2025 ജനുവരി ഒന്നുമുതൽ വിസയ്ക്ക് അപേക്ഷിക്കുമ്പോൾ കൺഫർമേഷൻ ഓഫ് എൻറോൾമെൻ്റ് കൂടി ഉണ്ടായിരിക്കണം. അല്ലാത്തപക്ഷം അപേക്ഷകൾ അസാധുവായി മാറും. കൂടാതെ, മറ്റു പ്രോസസുകൾ ചെയ്യാനും കഴിയില്ല. സിഒഇ ഇല്ലാതെ ബ്രിഡ്ജിങ് വിസയ്ക്കും അപേക്ഷിക്കാൻ കഴിയുകയില്ല. അതേസമയം 2025നു മുൻപ് സമർപ്പിച്ച അപേക്ഷകൾക്ക് ഇത് ബാധകമല്ല. ഡിഫൻസ്, സെക്കൻഡറി എക്സ്ചേഞ്ച്, ഫോറിൻ അഫേഴ്സ് എന്നീ കോഴ്‌സുകൾ പഠിക്കുന്ന വിദ്യാർഥികൾക്ക് ഈ നിയമത്തിൽനിന്ന് ഇളവ് നൽകിയിട്ടുണ്ട്.
