ലോകമെമ്പാടുമുള്ള അർബുദ മരണങ്ങളിൽ രണ്ടാം സ്ഥാനത്തും, ഏറ്റവും സാധാരണമായി കാണപ്പെടുന്ന മൂന്നാമത്തെ അർബുദമായും കുടൽ കാൻസർ തുടരുന്നു. ഇപ്പോഴിതാ, യുണൈറ്റഡ് കിംഗ്ഡത്തിൽ (യുകെ) ചെറുപ്പക്കാർക്കിടയിൽ കുടലിലെ അർബുദം ആശങ്കാജനകമായ തോതിൽ വർധിച്ചു വരുന്നതായി പുതിയ പഠനങ്ങൾ സൂചിപ്പിക്കുന്നു.
55 വയസ്സിന് താഴെയുള്ളവരിൽ കുടൽ കാൻസർ കേസുകൾ ഇരട്ടിയായി വർധിച്ചുവെന്നാണ് ഗവേഷകർ കണ്ടെത്തിയിരിക്കുന്നത്. കാൻസർ റിസർച്ച് യുകെ (Cancer Research UK) യുടെ വിവരങ്ങൾ അനുസരിച്ച്, 25 മുതൽ 49 വയസ്സുവരെയുള്ളവരിൽ ഈ രോഗം ഓരോ വർഷവും ശരാശരി 3.6 ശതമാനം എന്ന നിരക്കിൽ വർധിച്ചു കൊണ്ടിരിക്കുകയാണ്.
ഈ വർധനവിന് പ്രധാന കാരണം അമിതമായി സംസ്കരിച്ച ഭക്ഷണങ്ങളുടെ (ultra-processed foods) ഉപയോഗമാണെന്നാണ് പഠന റിപ്പോർട്ടുകൾ സൂചിപ്പിക്കുന്നത്. പാശ്ചാത്യ രാജ്യങ്ങളിലെ ഭക്ഷണരീതിയിൽ ഇത്തരം ഭക്ഷണങ്ങൾ ഒരു പ്രധാന ഭാഗമായി മാറിയതോടെയാണ് രോഗികളുടെ എണ്ണം ക്രമാതീതമായി ഉയരാൻ തുടങ്ങിയത്.
ഉയർന്ന അളവിൽ പഞ്ചസാര, കൊഴുപ്പ്, കൃത്രിമ ചേരുവകൾ എന്നിവ അടങ്ങിയ ഈ ഭക്ഷണങ്ങൾ ദഹന പ്രക്രിയയിലും, ശരീരത്തിന്റെ രോഗപ്രതിരോധ ശേഷിയിലും നിർണായക പങ്കുവഹിക്കുന്ന കുടലിലെ സൂക്ഷ്മജീവികളുടെ (gut microbiome) ആരോഗ്യത്തെ പ്രതികൂലമായി ബാധിക്കുന്നു. ഇത് കുടൽ കാൻസർ ഉൾപ്പെടെയുള്ള വിവിധ രോഗങ്ങൾക്ക് കാരണമാകാം.
അതേസമയം, കുടലിലെ അർബുദ സാധ്യത കുറയ്ക്കുന്നതിനും ആരോഗ്യകരമായ ജീവിതശൈലി പിന്തുടരുന്നതിനും പ്രഭാത ഭക്ഷണത്തിൽ തൈര് ഉൾപ്പെടുത്തുന്നത് ഗുണകരമാണെന്ന് വിദഗ്ധർ അഭിപ്രായപ്പെടുന്നു. പ്രോബയോട്ടിക് ധാരാളമായി അടങ്ങിയ യോഗർട്ട് കുടലിന്റെ ആരോഗ്യം മെച്ചപ്പെടുത്താൻ സഹായിക്കും. ശക്തമായ രോഗപ്രതിരോധ ശേഷി നിലനിർത്തുന്നതിലും യോഗർട്ടിന്റെ ഉപയോഗം സുപ്രധാനമാണ്.
ഏകദേശം 1,50,000 ആളുകൾ പങ്കെടുത്ത ഒരു പഠനത്തിൽ, ആഴ്ചയിൽ രണ്ടോ അതിലധികമോ തവണ യോഗർട്ട് കഴിക്കുന്നവരിൽ പ്രോക്സിമൽ കോളൻ കാൻസർ (proximal colon cancer) ഉണ്ടാകാനുള്ള സാധ്യത ഗണ്യമായി കുറവാണെന്ന് കണ്ടെത്തി. കാൻസർ പ്രതിരോധത്തിൽ പ്രോബയോട്ടിക് അടങ്ങിയ ഭക്ഷണങ്ങളുടെ പ്രാധാന്യം ഈ പഠനം എടുത്തു കാണിക്കുന്നു. ആരോഗ്യകരമായ ഭക്ഷണശീലങ്ങൾ പിന്തുടരുന്നതിലൂടെയും, സംസ്കരിച്ച ഭക്ഷണങ്ങളുടെ ഉപയോഗം കുറയ്ക്കുന്നതിലൂടെയും കുടൽ കാൻസറിനെ ഒരു പരിധി വരെ തടയാൻ സാധിക്കുമെന്നും ആരോഗ്യ വിദഗ്ധർ മുന്നറിയിപ്പ് നൽകുന്നു.
