രാജ്യവ്യാപകമായി സൈബർ കുറ്റകൃത്യങ്ങൾ നടത്തി കോടികൾ തട്ടിയെടുക്കുന്ന സംഘത്തിന്റെ തലവൻ കൊച്ചി സിറ്റി സൈബർ പൊലീസിന്റെ പിടിയിലായി. കൊൽക്കത്ത സ്വദേശിയായ ലിങ്കൺ ബിശ്വാസ് എന്നയാളാണ് അറസ്റ്റിലായത്. വ്യാഴാഴ്ച കോടതിയിൽ ഹാജരാക്കുന്ന പ്രതിയെ വിശദമായ ചോദ്യം ചെയ്യലിന് വിധേയമാക്കുമെന്ന് പൊലീസ് അറിയിച്ചു. ഡിജിറ്റൽ അറസ്റ്റ് എന്ന വ്യാജേന ഭീഷണിപ്പെടുത്തി കൊച്ചി കാക്കനാട് സ്വദേശിയിൽ നിന്ന് നാല് കോടി രൂപ തട്ടിയെടുത്ത കേസിലാണ് നിർണായക അറസ്റ്റ്.
കേസിന്റെ വിവരങ്ങൾ ഇപ്രകാരമാണ്: ‘പരാതിക്കാരിയായ വീട്ടമ്മയെ ഡൽഹിയിലെ ഐസിഐസിഐ ബാങ്കിൽ അവരുടെ പേരിൽ മറ്റൊരാൾ അക്കൗണ്ട് തുറന്നിട്ടുണ്ടെന്നും, ആ അക്കൗണ്ടിലൂടെ നിയമവിരുദ്ധ സാമ്പത്തിക ഇടപാടുകളും ലഹരി-മനുഷ്യക്കടത്തും നടത്തുന്നുണ്ടെന്നും വിശ്വസിപ്പിച്ചു. തുടർന്ന് അക്കൗണ്ടിലുള്ള പണം നിയമപരമാണോ എന്ന് പരിശോധിക്കണമെന്നും, പരിശോധനയ്ക്ക് ശേഷം പണം തിരികെ നൽകാമെന്നും വാഗ്ദാനം ചെയ്തു.
ഇരയെ പൂർണമായി വിശ്വസിപ്പിച്ച ശേഷം, അക്കൗണ്ടിലുള്ള മുഴുവൻ പണവും തങ്ങൾ നൽകുന്ന അക്കൗണ്ടിലേക്ക് ഓൺലൈൻ ട്രാൻസ്ഫർ ചെയ്യണമെന്ന് ആവശ്യപ്പെട്ടു. പണം നൽകിയില്ലെങ്കിൽ കേസ് രജിസ്റ്റർ ചെയ്യുമെന്നും ഭീഷണിപ്പെടുത്തി. ഈ തന്ത്രപരമായ സമീപനത്തിലൂടെയാണ് പ്രതി നാല് കോടി രൂപ തട്ടിയെടുത്തത്’
ഈ കേസിൽ നേരത്തെ അറസ്റ്റിലായ കൊണ്ടോട്ടി സ്വദേശികളിൽ നിന്നാണ് മുഖ്യ പ്രതിയെക്കുറിച്ചുള്ള സൂചന ലഭിച്ചത്. തുടർന്ന് കൊച്ചി സിറ്റി സൈബർ പൊലീസ് കൊൽക്കത്ത പൊലീസുമായി സഹകരിച്ച് നടത്തിയ സംയുക്ത നീക്കത്തിലാണ് ബംഗ്ലാദേശ് അതിർത്തിയോട് അടുത്ത കൃഷ്ണഗഞ്ചിൽ നിന്ന് ലിങ്കൺ ബിശ്വാസിനെ പിടികൂടിയത്.
പ്രതി രാജ്യത്തിന്റെ വിവിധ ഭാഗങ്ങളിൽ നടന്ന സൈബർ തട്ടിപ്പുകളുടെ മുഖ്യ സൂത്രധാരനാണെന്ന് പൊലീസ് കണ്ടെത്തി. ഇയാൾക്ക് കംബോഡിയയിലെ തട്ടിപ്പ് സംഘങ്ങളുമായി നേരിട്ട് ബന്ധമുണ്ടെന്നും, ഇതുവരെ കോടിക്കണക്കിന് രൂപ തട്ടിയെടുത്തതായും അന്വേഷണത്തിൽ വ്യക്തമായിട്ടുണ്ട്. ഈ കണ്ടെത്തലുകൾ സൈബർ കുറ്റകൃത്യങ്ങളുടെ വലിയൊരു ശൃംഖലയിലേക്കാണ് വിരൽ ചൂണ്ടുന്നത്.
സൈബർ പൊലീസ് എസിപി മുരളിയുടെ മേൽനോട്ടത്തിൽ പൊലീസ് ഇൻസ്‌പെക്ടർ പി.ആർ. സന്തോഷ്, എ.എസ്.ഐ. വി. ശ്യാം കുമാർ, പൊലീസ് ഓഫീസർമാരായ ആർ. അരുൺ, അജിത് രാജ്, നിഖിൽ ജോർജ്, ഷറഫുദ്ധീൻ, ആൽഫിറ്റ് ആൻഡ്രൂസ് എന്നിവരടങ്ങിയ പ്രത്യേക സംഘമാണ് കൊൽക്കത്തയിൽ എത്തി പ്രതിയെ പിടികൂടിയത്.
