കോട്ടയം: കോട്ടയം വഴിയുള്ള ട്രെയിനുകൾ വൈകിയോടുന്നു. കോട്ടയം അടിച്ചിറ പാറോലിക്കൽ ഗേറ്റുകൾക്കിടയിൽ ട്രാക്കിൽ വിള്ളൽ കണ്ടതിനെ തുടർന്നാണ് ട്രെയിനുകൾ വൈകുന്നത്. വിള്ളൽ താത്ക്കാലികമായി പരിഹരിച്ചു. വെൽഡിങ്ങിനെ തുടർന്നുള്ള തകരാറാണ് വിള്ളലുണ്ടാകാനുള്ള കാരണമെന്ന് റെയിൽവേയെ ഉദ്ധരിച്ചു ഏഷ്യാനെറ്റ് ന്യൂസ് റിപ്പോർട്ട് ചെയ്തു.
ശനിയാഴ്ച രാവിലെ 9:30ഓടെയാണ് പാറോലിക്കൽ ഗേറ്റുകൾക്കിടയിൽ വിള്ളൽ കണ്ടെത്തിയത്. ട്രാക്ക്മാൻ്റെ രാവിലത്തെ പരിശോധനയിലാണ് വിള്ളൽ ശ്രദ്ധയിൽപെട്ടത്. ഇതിനു പിന്നാലെ അറ്റകുറ്റപ്പണി ആരംഭിച്ചിരുന്നു. നിലവിൽ അരമണിക്കൂറിലധികം നേരം ട്രെയിനുകൾ വൈകിയോടുന്നുണ്ട്.
തിരുവനന്തപുരം – ഹൈദരാബാദ് ശബരി, കന്യാകുമാരി – മംഗളൂരു പരശുറാം എക്സ്പ്രസുകൾ അരമണിക്കൂറോളം കോട്ടയത്ത് പിടിച്ചിട്ടത് യാത്രക്കാരെ ബുദ്ധിമുട്ടിലാക്കി. കൊല്ലം – എറണാകുളം മെമുവും കോട്ടയത്ത് അരമണിക്കൂറോളം പിടിച്ചിട്ടു. നിലവിൽ ട്രെയിനുകൾ ഓടിത്തുടങ്ങി.
ട്രാക്കിലെ വിള്ളൽ താത്ക്കാലികമായി പരിഹരിക്കാനാണ് റെയിൽവേയ്ക്ക് സാധിച്ചിരിക്കുന്നത്. ഈ സാഹചര്യത്തിൽ കോട്ടയത്തിനും ഏറ്റുമാനൂരിനും ഇടയിൽ ട്രെയിനുകൾ വേഗത കുറച്ചാകും സർവീസ് നടത്തുക. വിള്ളൽ പൂർണമായും പരിഹരിച്ച ശേഷമാകും സാധാരണ വേഗത്തിൽ ട്രെയിനുകൾ സർവീസ് നടത്തുകയെന്നാണ് വിവരം.
