ഹമാസിനെതിരായ ഗാസ യുദ്ധത്തിനിടെ വിശ്വാസ്യതയിലുണ്ടായ തകര്‍ച്ചയുടെ പേരില്‍ പ്രതിരോധ മന്ത്രി യോവ് ഗാലന്റിനെ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു പുറത്താക്കിയതായി അദ്ദേഹത്തിന്റെ ഓഫീസ് അറിയിച്ചു. വിദേശകാര്യ മന്ത്രി ഇസ്രായേല്‍ കാറ്റ്സിനെ പുതിയ പ്രതിരോധ മന്ത്രിയായി നിയമിച്ചതായി നെതന്യാഹു പറഞ്ഞു.
കഴിഞ്ഞ വര്‍ഷം ഒക്ടോബര്‍ ഏഴിന് ഇസ്രയേലിനെതിരെ പാലസ്തീന്‍ തീവ്രവാദി സംഘം നടത്തിയ മാരകമായ ആക്രമണത്തെത്തുടര്‍ന്ന് ഹമാസിനെതിരായ ഇസ്രയേലിന്റെ പ്രതികാര സൈനിക ആക്രമണത്തെച്ചൊല്ലി ഇരുവരും പലപ്പോഴും ഏറ്റുമുട്ടിയിരുന്നു.
”ഒരു യുദ്ധത്തിനിടയില്‍, എന്നത്തേക്കാളും കൂടുതല്‍, പ്രധാനമന്ത്രിയും പ്രതിരോധ മന്ത്രിയും തമ്മില്‍ പൂര്‍ണ്ണ വിശ്വാസം ആവശ്യമാണ്,” നെതന്യാഹുവിന്റെ ഓഫീസ് പുറത്തിറക്കിയ പ്രസ്താവനയില്‍ പറയുന്നു.
‘യുദ്ധത്തിന്റെ ആദ്യ മാസങ്ങളില്‍ അത്തരം വിശ്വാസവും വളരെ ഉല്‍പ്പാദനക്ഷമമായ പ്രവര്‍ത്തനവും ഉണ്ടായിരുന്നുവെങ്കിലും, കഴിഞ്ഞ കുറച്ച് മാസങ്ങളായി ആ വിശ്വാസം നശിച്ചു,’ നെതന്യാഹു തന്റെ ലിക്കുഡ് പാര്‍ട്ടി സഹപ്രവര്‍ത്തകനെ കുറിച്ച് കൂട്ടിച്ചേര്‍ത്തു. താനും ഗാലന്റും തമ്മിലുള്ള അഭിപ്രായവ്യത്യാസങ്ങള്‍ പരിഹരിക്കാന്‍ താന്‍ ശ്രമിച്ചിട്ടുണ്ടെന്നും നെതന്യാഹു പറഞ്ഞു. എന്നാല്‍ അവ കൂടുതല്‍ വഷളാവുകയാണ് ഉണ്ടായതെന്ന് അദ്ദേഹം പറഞ്ഞു.
‘ഇസ്രായേല്‍ രാജ്യത്തിന്റെ സുരക്ഷ എന്നും എന്റെ ജീവിത ദൗത്യമായി തുടരും’ എന്ന് സോഷ്യല്‍ മീഡിയയില്‍ പോസ്റ്റ് ചെയ്തുകൊണ്ടാണ് ഗാലന്റ് തന്റെ പുറത്താക്കലിനോട് പ്രതികരിച്ചത്.
