തിരുവനന്തപുരം: പാറശാല ഷാരോൺ കേസിൽ ഗ്രീഷ്മയെ വധശിക്ഷയ്ക്ക് വിധിച്ചിരിക്കുകയാണ്. ഇതോടെ കേരളത്തിൽ നിന്നും വധശിക്ഷ ലഭിക്കുന്ന രണ്ടാമത്തെ സ്ത്രീയായി ഗ്രീഷ്മ. റഫീഖ ബീവിയാണ് കേരളത്തിൽ നിന്നും വധശിക്ഷ കാത്ത് കിടക്കുന്ന മറ്റൊരു വനിത. വളരെ അപൂർവമായ കേസുകളിൽ മാത്രമേ ഇന്ത്യയിൽ തൂക്ക് കയർ വിധിക്കുകയുള്ളു. ഷാരോൺ വധക്കേസിൽ തൂക്ക് കയർ വിധിച്ചതോടെ വധശിക്ഷയുമായി ബന്ധപ്പെട്ട ചർച്ചകൾ വീണ്ടും സജീവമായിരിക്കുകയാണ്. ഗ്രീഷ്മയ്ക്കും റഫീഖയ്ക്കും വധശിക്ഷ വിധിച്ചിരിക്കുന്നത് ഒരേ കോടതിയും ഒരേ ജഡ്ജിയുമാണ് എന്നത് ശ്രദ്ധേയമാണ്.
എന്താണ് റഫീഖ ബീവിയുടെ കേസ്?
തിരുവനന്തപുരത്ത് ശാന്തകുമാരിയെ കൊലപ്പെടുത്തിയ കേസിലാണ് റഫീഖ ബീവി അറസ്റ്റിലാകുന്നത്. ചുറ്റിക കൊണ്ട് തലക്ക് അടിച്ചാണ് റഫീഖ ബീവി ശാന്തകുമാരിയെ കൊലപ്പെടുത്തിയത്. അന്ന് വളരെ കോളിളക്കം സൃഷ്ടിച്ച കേസായിരുന്നു ഇത്. പോലീസ് നടത്തിയ പഴുതടച്ചുള്ള അന്വേഷണത്തിന്റെ ഭാഗമായാണ് റഫീഖ ബീവിയും മകനും പിടിക്കപ്പെടുന്നത്. അന്വേഷണത്തിൽ ഇവർ ഒരു കൊലപാതകം മാത്രമല്ല നടത്തിയത് എന്ന് പോലീസ് കണ്ടെത്തിയിരുന്നു. പതിനാലുകാരിയെ റഫീഖയുടെ മകന്‍ ഷെഫീഖ് പീഡിപ്പിച്ച് കൊലപ്പെടുത്തുകയായിരുന്നു. പ്രതികള്‍ വാടകക്ക് താമസിച്ചിരുന്ന വീടിന്‍റെ ഉടമയെ പോലീസ് ചോദ്യം ചെയ്തപ്പോള്‍ ലഭിച്ച മൊഴിയാണ് കേസില്‍ വഴിത്തിരിവായി മാറിയത്. ‘മകന്‍ കാരണം ഒരു പെണ്ണ് ചത്തു’വെന്ന് റഫീഖ ഒരിക്കല്‍ പറഞ്ഞിരുന്നതായി വീട്ടുടമ പോലീസിനു മൊഴി നല്‍കി. ഇതിനുപിന്നാലെ അന്വേഷണം നടത്തിയ പൊലീസിന് ഈ കേസും തെളിയിക്കാൻ സാധിച്ചിരുന്നു. ഷെഫീഖ് പീഡിപ്പിച്ച വിവരം പുറത്താരും അറിയാതിരിക്കാന്‍ പെണ്‍കുട്ടിയെ ചുറ്റിക കൊണ്ട് ഇവർ തലയ്ക്ക് അടിച്ച് കൊല്ലുകയായിരുന്നുവെന്നാണ് അന്വേഷണ സംഘം കണ്ടെത്തിയത്.
ശാന്തകുമാരിയെ എന്തിന് കൊലപ്പെടുത്തി?
ശാന്തകുമാരിയെ കൊലപ്പെടുത്തി വീട്ടിലെ തട്ടില്‍ ഒളിപ്പിച്ചതിന് പിന്നില്‍ സ്വര്‍ണാഭരണം തട്ടിയെടുക്കാനുള്ള ആസൂത്രണമായിരുന്നു എന്നാണ് പോലീസ് പറയുന്നത്. ഒറ്റയ്ക്ക് താമസിച്ചിരുന്ന ഇവരെ വിളിച്ചുവരുത്തി കൊലപ്പെടുത്തി ഏഴരപ്പവന്‍ സ്വർണം റഫീഖ ബീവി , മകന്‍ ഷഫീഖ്, സുഹൃത്ത് അല്‍അമീന്‍ എന്നിവർ തട്ടിയെടുക്കുകയായിരുന്നു. സംഭവം നടക്കുന്നതിന് ഒരാഴ്ച മുൻപ് റഫീഖയും മകന്‍ ഷഫീഖും തമ്മിൽ വഴക്കുണ്ടായിരുന്നു. ഇതോടെ വീട്ടുടമ ഇവരോട് വീട് ഒഴിയാന്‍ നിർദ്ദേശം നൽകി. വീട് ഒഴിയുന്നതിന് മുന്നോടിയായി വീട്ടിലുണ്ടായിരുന്ന പാത്രങ്ങള്‍ ഉള്‍പ്പടെയുള്ള സാധനങ്ങള്‍ കൊല്ലപ്പെട്ട ശാന്തകുമാരിക്കാണ് റഫീഖ വിറ്റത്. ഇതിന്റെ കാശ് നല്കാൻ വീട്ടില്‍ എത്തിയ ശാന്തകുമാരിയെ പ്രതികള്‍ കഴുത്തില്‍ ഷാള്‍ മുറുക്കി തലയ്ക്ക് ചുറ്റികയ്ക്ക് അടിച്ച് കൊലപ്പെടുത്തുകയായിരുന്നു എന്നാണ് അന്വേഷണത്തിൽ തെളിഞ്ഞത്. ഒരു വർഷം മുമ്പ് നെയ്യാറ്റിൻകര കോടതി തന്നെയാണ് റഫീക്ക ബീവിക്കും കൂട്ടുപ്രതികളായ മകനും കൂട്ടുകാരനും വധശിക്ഷ വിധിച്ചത്. അതേ കോടതിയും അതേ ജഡ്ജും ആണ് ഷാരോൺ കേസും പരിഗണിച്ചത്.
ഷാരോൺ കേസ്
കേരള മനസാക്ഷിയെ ഏറെ വേദനിപ്പിച്ച ഒരു കേസായിരുന്നു ഷാരോണിന്റെ കൊലപാതകം. കേരളം വളരെ വൈകാരികമായാണ് ഈ കേസിനോട് പ്രതികരിച്ചത്. ഷാരോൺ വധക്കേസിൽ തൂക്കുകയർ വിധിച്ചതോടെ വധശിക്ഷയ്ക്ക് വിധിക്കപ്പെടുന്ന കേരളത്തിലെ പ്രായം കുറഞ്ഞ വനിതാ കുറ്റവാളിയായി ഗ്രീഷ്മ മാറി. മരണം വരെ തൂക്കികൊല്ലാനാണ് കോടതി വിധിയിൽ പറയുന്നത്. അഡീഷണല്‍ സെഷന്‍സ് കോടതി ജഡ്ജി എ.എം. ബഷീറിന്‍റെയാണ് വിധി.
