ഇന്ത്യൻ സൂപ്പർ ലീഗ് ( ഐ എസ് എൽ ) ഫുട്ബോൾ 2024 – 2025 സീസണിലേക്കുള്ള മുന്നൊരുക്കത്തിലാണ് കേരളത്തിന്റെ സ്വന്തം കേരള ബ്ലാസ്റ്റേഴ്സ് എഫ് സി. ഇന്ത്യൻ സൂപ്പർ ലീഗിന്റെ തുടക്കം മുതൽ കളിക്കളത്തിൽ ഉണ്ടെങ്കിലും കൊച്ചി ക്ലബ്ബിനു ഇതുവരെ ഒരു ട്രോഫി പോലും സ്വന്തമാക്കാൻ സാധിച്ചിട്ടില്ല. 11 -ാം സീസൺ ഐ എസ് എൽ പോരാട്ടത്തിന് ഇറങ്ങുമ്പോഴും കന്നിക്കിരീടം എന്ന ലക്ഷ്യത്തിലാണ് കേരള ബ്ലാസ്റ്റേഴ്സ് എഫ് സി.
2024 – 2025 പ്രീ സീസൺ ട്രാൻസ്ഫറിൽ കേരള ബ്ലാസ്റ്റേഴ്സ് എഫ് സി യുടെ നീക്കങ്ങൾ ആരാധക പ്രതിഷേധത്തിനും കാരണമായിരുന്നു. ബ്ലാസ്റ്റേഴ്സിന്റെ മഞ്ഞപ്പട ആരാധക കൂട്ടായ്മ ക്ലബ്ബിന് എതിരേ പ്രസ്താവന പോലും ഇറക്കി. 2024 – 2025 പ്രീ സീസണിൽ ജീക്സൺ സിങ്, ദിമിത്രിയോസ് ഡയമാന്റകോസ് എന്നിവരെ കൈവിട്ടതിൽ ആയിരുന്നു മഞ്ഞപ്പട ആരാധകർക്ക് അസംതൃപ്തി. എന്നാൽ, ഇക്കാര്യം നേരിട്ട് സൂചിപ്പിച്ചില്ലെങ്കിലും ട്രാൻസ്ഫർ വിൻഡോയിലെ ഇടപെടലുകളിൽ പ്രതിഷേധിക്കുന്നതായാണ് മഞ്ഞപ്പട പ്രസ്താവിച്ചത്.
ഗ്രീക്ക് താരം ദിമിത്രിയോസ് ഡയമാന്റകോസ് കേരള ബ്ലാസ്റ്റേഴ്സ് വിട്ടെങ്കിലും പകരം മറ്റൊരു താരത്തെ സ്വന്തമാക്കാൻ ക്ലബ് വൈകിയിരുന്നു. ഇതാണ് ആരാധകരെ ചൊടിപ്പിച്ചതിൽ ഒരു കാര്യം. ഏതായാലും സെന്റർ സ്ട്രൈക്കറെ സ്വന്തമാക്കാൻ കേരള ബ്ലാസ്റ്റേഴ്സ് എഫ് സി എന്തുകൊണ്ട് വൈകി എന്ന കാരണം വെളിപ്പെടുത്തിയിരിക്കുകയാണ് സ്പോർട്ടിങ് ഡയറക്ടറായ കരോളിൻ സ്കിൻകിസ്.
”ഞങ്ങളുടെ ( കേരള ബ്ലാസ്റ്റേഴ്സ് ) ആഗ്രഹം നേരത്തേ തന്നെ സെന്റർ സ്ട്രൈക്കറെ സ്വന്തമാക്കുക എന്നതായിരുന്നു. അങ്ങനെ എങ്കിൽ പ്രീ സീസണിൽ തന്നെ പരിശീലനം തുടങ്ങാം. അതിൽ എതിർ സ്വരം ഇല്ലായിരുന്നു. എന്നാൽ, ഞങ്ങൾ ആഗ്രഹിച്ച ക്വാളിറ്റിയും സ്റ്റാൻഡേർഡും ഉള്ള ഒരു കളിക്കാരനെ കണ്ടെത്തുക എന്നത് വിഷമകരമായിരുന്നു.
കേരള ബ്ലാസ്റ്റേഴ്സ് എഫ് സിയെ പ്രതിനിധീകരിക്കാൻ പറ്റിയ ഒരു താരത്തിനായുള്ള തെരച്ചിലിൽ മേയിൽ ഒരു കളിക്കാരനു ഓഫർ വെച്ചു. ഒരു സ്ട്രൈക്കറിന് മേയിൽ ഓഫർ വെച്ചതാണ്, ഏപ്രിൽ അവസാനം തന്നെ എന്നതാണ് ശരിക്കുള്ള ഉത്തരം. ഞങ്ങൾ പരിശ്രമിച്ചു പക്ഷേ, നടന്നില്ല. നേരത്തേ തന്നെ സൈനിങ് നടക്കേണ്ടതായിരുന്നു എന്ന് സമ്മതിക്കുന്നു. ഭാവിയിൽ ഇത്തരം സാഹചര്യങ്ങൾ എങ്ങനെ ഒഴിവാക്കാം എന്നതാണ് ഇപ്പോൾ ഞാൻ ചിന്തിക്കുന്നത്. ചിലപ്പോൾ ചില കഠിന പ്രയോഗങ്ങൾ തുടക്കത്തിലേ ചെയ്യേണ്ടി വരും” – കരോളിസ് സ്കിൻകിസ് പറഞ്ഞു.
ജീക്സൺ സിങ്ങിനെ കഴിഞ്ഞ സീസണിൽ തന്നെ വിൽക്കാൻ കേരള ബ്ലാസ്റ്റേഴ്സ് എഫ് സി തയാറായിരുന്നു എന്നും ദിമിത്രിയോസ് ഡയമാന്റകോസ് ക്ലബ് വിടാൻ തീരുമാനിച്ചതായിരുന്നു എന്നും കരോളിസ് സ്കിൻകിസ് വ്യക്തമാക്കി. ജീക്സൺ സിങ്ങിന് പകരമായി മറ്റ് സ്വദേശി താരങ്ങളുടെ പ്രകടനത്തെ ക്ലബ് വിശ്വസിക്കാൻ ആഗ്രഹിക്കുന്നു എന്നും അദ്ദേഹം കൂട്ടിച്ചേർത്തു.
ദിമിത്രിയോസ് ഡയമാന്റകോസിനു പകരം ജെസ്യൂസ് ജിമെനെസിനെ ആണ് കൊച്ചി ക്ലബ് സെന്റർ സ്ട്രൈക്കറായി സ്വന്തമാക്കിയത്. സ്പാനിഷ് താരമായ ജിമെനെസ് 2026 മേയ് 31 വരെ നീളുന്ന രണ്ടു വർഷ കരാറിലാണ് ഒപ്പു വെച്ചിരിക്കുന്നത്. ഗ്രീക്ക് ക്ലബ്ബായ ഒ എഫ് ഐ ക്രെറ്റെയ്ക്കു വേണ്ടിയായിരുന്നു ജിമെനെസ് ബൂട്ടണിഞ്ഞിരുന്നത്. 2024 ഫെബ്രുവരിയിലായിരുന്നു ഗ്രീക്ക് ക്ലബ്ബിൽ ജിമെനെസ് ചേക്കേറിയത്. എന്നാൽ, ഓഗസ്റ്റ് 30 ന് കൊച്ചി ക്ലബ്ബിലേക്ക് ചേക്കേറി. ക്ലബ് കരിയറിൽ 338 മത്സരങ്ങളിൽ 110 ഗോൾ നേടിയിട്ടുണ്ട് ജിമെനെസ്.
