കുവൈറ്റ് സിറ്റി: വാട്സ്ആപ്പ് വഴി വിദ്യാര്ഥിക്ക് അശ്ലീല സന്ദേശങ്ങളും ചിത്രങ്ങളും അയച്ച അധ്യാപകനെതിരേ കുവൈറ്റില് കേസ്. സ്കൂള് അധ്യാപകനായ ഇയാളെ റിമാന്ഡ് ചെയ്യാന് കുവൈറ്റ് പ്രോസിക്യൂട്ടര്മാര് ഉത്തരവിട്ടതായി കുവൈറ്റ് മാധ്യമങ്ങള് റിപ്പോര്ട്ട് ചെയ്തു. ഇയാൾ കുവൈറ്റ് പൗരനാണെന്നാണ് റിപ്പോർട്ട്. അശ്ലീലം, വേശ്യാവൃത്തി എന്നിവയ്ക്ക് പ്രേരിപ്പിച്ച കുറ്റമാണ് അധ്യാപകനെതിരെ ചുമത്തിയിരിക്കുന്നത്. അതേസമയം, അധ്യാപകന്റെയോ വിദ്യാര്ഥിയുടെയോ പ്രായമോ മറ്റു വിശദാംശങ്ങലോ പുറത്തുവിട്ടിട്ടില്ല.
കുവൈറ്റ് പൗരനായ അധ്യാപികൻ സമൂഹമാധ്യമ അക്കൗണ്ടിലൂടെ അധാര്മ്മികമായ ചിത്രങ്ങളും വീഡിയോ ദൃശ്യങ്ങളും ശബ്ദ സന്ദേശങ്ങളും വിദ്യാര്ഥിക്ക് അയച്ചുകൊടുത്തുവെന്നാണ് ആരോപണം. പ്രതി ഇതിന് മുൻപും സമാനമായ മറ്റൊരു കേസില് ശിക്ഷിക്കപ്പെട്ടതായും അന്വേഷണത്തില് വ്യക്തമായതായി പബ്ലിക് പ്രൊസിക്യൂട്ടര് അറിയിച്ചു. അന്വേഷണത്തിനിടെ ഇയാള് കുറ്റം സമ്മതിച്ചതായും കൂടുതല് ചോദ്യം ചെയ്യുന്നതിനായി പോലീസ് കസ്റ്റഡിയില് സൂക്ഷിച്ചതായും കുവൈറ്റ് പത്രമായ അല് ഖബസ് റിപ്പോര്ട്ട് ചെയ്തു.
അധ്യാപകൻ മുൻപ് സമാനമായ കുറ്റത്തിന് ശിക്ഷിക്കപ്പെട്ടിരുന്നു എന്നത് കുറ്റത്തിന്റെ ഗൗരവം വര്ധിപ്പിക്കുന്നതായി പ്രൊസിക്യൂഷന് അറിയിച്ചു. സമാനമായ മറ്റു സംഭവങ്ങള് ഇയാളുടെ ഭാഗത്തു നിന്നുണ്ടായിട്ടുണ്ടോ എന്ന് പോലിസ് അന്വേഷിച്ചു വരികയാണ്. ഇതുമായി ബന്ധപ്പെട്ട് വിശദമായ അന്വേഷണം നടത്തുമെന്നും പോലിസ് അറിയിച്ചു. കുവൈറ്റ് നിയമപ്രകാരം തടവ് ശിക്ഷ ഉള്പ്പെടെ ലഭിക്കാവുന്ന ഗുരുതരമായ കുറ്റമാണിത്.
അധ്യാപകന്റെ റിമാന്ഡ് സംബന്ധിച്ച് ബന്ധപ്പെട്ട ഏജന്സികളുമായി ചര്ച്ച ചെയ്തുവരികയാണെന്ന് കുവൈറ്റ് വിദ്യാഭ്യാസ മന്ത്രാലയം അറിയിച്ചു. ഇസ്ലാമിക മൂല്യങ്ങളെയും സമൂഹത്തിന്റെ പാരമ്പര്യങ്ങളെയും ലംഘിക്കുന്ന ഇത്തരം അധാര്മിക പ്രവൃത്തികളെ ഒരു രീതിയിലും അംഗീകരിക്കാനാവില്ലെന്ന് മന്ത്രാലയം പ്രസ്താവനയില് പറഞ്ഞു. ഒരു അധ്യാപകന്റെ ഉത്തരവാദത്തിനും ഉദാത്തമായ പദവിക്കും ചേര്ന്നതല്ലാത്ത പെരുമാറ്റമാണ് അധ്യാപകന്റെ ഭാഗത്തു നിന്നുണ്ടായത്. പൊതു ധാര്മികതയും വിദ്യാര്ഥികളുടെ സുരക്ഷയും മാനസികവും സാമൂഹികവുമായ ക്ഷേമവും ഉറപ്പുവരുത്തുകയെന്നത് മന്ത്രാലയത്തിന്റെ ഉത്തരവാദിത്തമാണെന്നും അതിന്റെ അടിസ്ഥാനത്തിലാണ് അധ്യാപകനെതിരായ ശക്തമായ നടപടിയെന്നും അധികൃതര് വ്യക്തമാക്കി.
കഴിഞ്ഞ ഫെബ്രുവരിയില്, സ്കൂള് വിദ്യാര്ഥിയെ മര്ദിച്ചതിന് ഒരു അധ്യാപകനെ കുവൈറ്റ് കോടതി ശിക്ഷിച്ചിരുന്നു. വിദ്യാര്ഥിയുടെ മാതാപിതാക്കള്ക്ക് പ്രാഥമിക നഷ്ടപരിഹാരമായി 5,001 ദിനാര് നല്കണമെന്ന് കോടതി ഉത്തരവിട്ടു. ഒരു എലിമെന്ററി സ്കൂളില് ജോലി ചെയ്യുന്ന അധ്യാപകന് കുട്ടിയുടെ മുഖത്തടിക്കുകയും അപമാനിക്കുകയും ചെയ്തുവെന്നായിരുന്നു കുറ്റം. ഇതിനെ തുടര്ന്ന് കുട്ടിക്ക് ധാര്മ്മികവും ശാരീരികവുമായ ദ്രോഹങ്ങള് നേരിടേണ്ടി വന്നതിനാലാണ് നഷ്ടപരിഹാരം നല്കിയതെന്ന് ഒരു മാധ്യമം റിപ്പോര്ട്ട് ചെയ്തു.