കുവൈറ്റ് സിറ്റി: വിദ്യാഭ്യാസത്തിലൂടെ ജയില്‍ തടവുകാരുടെ പുനരധിവാസം കൂടുതല്‍ ശക്തമാക്കുന്നതിനുള്ള ശ്രമങ്ങളുടെ ഭാഗമായി കുവൈറ്റ് ആഭ്യന്തര മന്ത്രാലയം രാജ്യത്തെ തിരുത്തല്‍ സൗകര്യങ്ങള്‍ക്കുള്ളില്‍ ഒരു പുതിയ സ്‌കൂള്‍ ഉദ്ഘാടനം ചെയ്തു. പുരുഷന്മാര്‍ക്കും സ്ത്രീകള്‍ക്കും സെക്കന്‍ഡറി തലത്തിലും ഇന്റര്‍മീഡിയറ്റ് തലത്തിലും പഠനം തുടരാനുള്ള അവസരങ്ങള്‍ ഇവിടെ ലഭിക്കും.
ദേശീയ മനുഷ്യാവകാശ കമ്മീഷന്‍, ഹ്യൂമന്‍ ഡെവലപ്മെന്റ് അസോസിയേഷന്‍, വിദ്യാഭ്യാസ മന്ത്രാലയം തുടങ്ങിയ പ്രധാന പങ്കാളികളുമായി സഹകരിച്ച്, ശിക്ഷാകാലാവധിയില്‍ തടവുകാരെ ഔപചാരിക വിദ്യാഭ്യാസം നേടാന്‍ അനുവദിക്കുകയും തിരുത്തല്‍ സൗകര്യങ്ങള്‍ക്കുള്ളില്‍ വിദ്യാഭ്യാസ അടിസ്ഥാന സൗകര്യങ്ങള്‍ മെച്ചപ്പെടുത്തുകയും ചെയ്യുക എന്നതാണ് ഈ പരിപാടി ലക്ഷ്യമിടുന്നതെന്ന് അധികൃതര്‍ അറിയിച്ചു.
തടവുകാര്‍ക്ക് വിദ്യാഭ്യാസ അവസരങ്ങള്‍ നല്‍കുന്നത് സമൂഹത്തിലേക്ക് അവരെ പുനക്രമീകരിക്കുന്നതിനും കുറ്റകൃത്യങ്ങള്‍ ആവര്‍ത്തിക്കുന്നത് കുറയ്ക്കുന്നതിനും ആവശ്യമായ ബോധവല്‍ക്കരണവും സാഹചര്യവും സൃഷ്ടിക്കാന്‍ സഹായിക്കുമെന്ന് തിരുത്തല്‍ സ്ഥാപനങ്ങള്‍ക്കും ശിക്ഷാ നിര്‍വഹണത്തിനുമുള്ള അസിസ്റ്റന്റ് അണ്ടര്‍സെക്രട്ടറി ബ്രിഗേഡിയര്‍ ഫഹദ് അല്‍ ഉബൈദ് അഭിപ്രായപ്പെട്ടു. പുതുതായി സ്ഥാപിതമായ സ്‌കൂളില്‍ മതപഠനവും ഉള്‍പ്പെടുന്നു, 2024- 2025 അധ്യയന വര്‍ഷം അന്തേവാസികളുടെ സാംസ്‌കാരികവും ധാര്‍മ്മികവുമായ അടിത്തറ ശക്തിപ്പെടുത്തുന്നതിന് ശരീഅ സയന്‍സസിലുള്ള കോഴ്‌സുകളാണ് ഇവിടെ വാഗ്ദാനം ചെയ്യുന്നത്.
കുവൈറ്റിലെ പ്രധാന ജയില്‍ സമുച്ചയത്തിനുള്ളില്‍ തടവുകാര്‍ക്ക് സ്വകാര്യ കുടുംബ സന്ദര്‍ശനങ്ങള്‍ വാഗ്ദാനം ചെയ്യുന്ന പുതിയ സൗകര്യം ആഭ്യന്തര മന്ത്രാലയം ഉടന്‍ തുറക്കും. ‘ഫാമിലി ഹൗസ്’ എന്ന് വിളിക്കപ്പെടുന്ന ഈ സംവിധാനം വിവാഹിതരായ തടവുകാര്‍ക്ക് അവരുടെ കുടുംബങ്ങളുമായി കൂടിക്കാഴ്ച നടത്താന്‍ അനുവദിക്കുന്ന ഒരു സംരംഭമാണ്. ജഹ്റ ഗവര്‍ണറേറ്റിലെ സുലൈബിയ ഏരിയയിലെ ജയില്‍ കോംപ്ലക്സിനുള്ളില്‍ ഇതിനായുള്ള സൗകര്യം ഒരുക്കിയിട്ടുണ്ടെന്ന് ബ്രിഗേഡിയര്‍ ജനറല്‍ ഫഹദ് അല്‍ ഒബൈദ് പറഞ്ഞു. ഇത് ഉടന്‍ തന്നെ ഔദ്യോഗികമായി പ്രവര്‍ത്തനം തുടങ്ങും.
ജയില്‍ സമുച്ചയത്തിനുള്ളില്‍ പ്രത്യേകം രൂപകല്‍പ്പന ചെയ്ത ഭവന യൂണിറ്റുകളില്‍ തടവുകാര്‍ക്ക് അവരുടെ ജീവിത പങ്കാളികള്‍, കുട്ടികള്‍, മാതാപിതാക്കള്‍, സഹോദരങ്ങള്‍ എന്നിവരോടൊപ്പം സമയം ചെലവഴിക്കാന്‍ ഫാമിലി ഹൗസ് സഹായിക്കും. ഈ സ്വകാര്യ കുടുംബ സന്ദര്‍ശനങ്ങള്‍ക്ക് ഏതൊക്കെ തടവുകാരാണ് യോഗ്യരെന്നും ഓരോ സന്ദര്‍ശനത്തിന്റെയും കാലാവധിയും ഭരണകൂടം നിര്‍ണയിക്കും.
കൊലപാതകം, മയക്കുമരുന്ന് കുറ്റകൃത്യങ്ങളോ പോലുള്ള ഗുരുതരമായ കുറ്റകൃത്യങ്ങളില്‍ ശിക്ഷിക്കപ്പെട്ടവര്‍ ഉള്‍പ്പെടെ എല്ലാ തടവുകാര്‍ക്കും ഈ സൗകര്യം ലഭിക്കുമോ എന്ന കാര്യം ഇതുവരെ വ്യക്തമാക്കിയിട്ടില്ല. കുവൈറ്റിലെ ജയില്‍ സമുച്ചയത്തില്‍ വനിതാ ജയിലും നാടുകടത്താന്‍ കാത്തിരിക്കുന്ന താമസക്കാര്‍ക്കുള്ള സൗകര്യങ്ങളും ഉള്‍പ്പെടെ വിവിധ വിഭാഗങ്ങളിലായി വിവിധ രാജ്യങ്ങളില്‍ നിന്നുള്ള ഏകദേശം 5,000 തടവുകാരാണുള്ളത്.
