ന്യൂയോർക്ക്: ശാസ്ത്രലേഖകനും കവിയും ലിറ്റററി അസോസിയേഷൻ ഓഫ് നോർത്ത അമേരിക്കയുടെ(ലാന)പ്രഥമ പ്രസിഡന്‍റുമായ ഡോ. എം.എസ്.ടി. നമ്പൂതിരിയുടെ നിര്യാണത്തിൽ ലാന ഭരണസമിതി അഗാധമായ ദുഃഖവും അനുശോചനവും രേഖപ്പെടുത്തി.
ലാനയെ സ്ഥാപകപ്രസിഡന്‍റായ എം. എസ്. ടി. ലാനയെ ഇന്നത്തെ നിലയിലേക്ക് വളർത്തുന്നതിൽ അനിതസാധാരണമായ പങ്കാണ്‌ വഹിച്ചിട്ടുള്ളത്. അമേരിക്കൻ പ്രവാസി സാഹിത്യത്തിന്‍റെ കേരളത്തിലെ പതാകവാഹകരിൽ ഒരാളായിരുന്നു ഡോ. എം.എസ്.ടി.
അമേരിക്കയിൽ മലയാള സാഹിത്യം ഊട്ടിയുറപ്പിച്ചവരുടെ മുൻനിരയിലാണ് ഡോ. എം.എസ്.ടി. നമ്പൂതിരിയുടെ സ്‌ഥാനം. 57 വർഷം മുൻപ് അമേരിക്കയിലേക്ക് കുടിയേറിയ ഡോ. എം.എസ്.ടി.നമ്പൂതിരി മലയാളത്തിലെ പ്രവാസി സാഹിത്യത്തിനും മലയാള ഭാഷക്കും നൽകിയ സംഭാവനകൾ നിരവധിയാണ്.
കവിതയും ശാസ്ത്രലേഖങ്ങളും എഴുതുന്ന ഡോ. എം.എസ്.ടി. നമ്പൂതിരി അമേരിക്കയിലെ പല ഭാഷാ സംഘടനകൾക്കും സാംസ്കാരിക സംഘടനകൾക്കും മാർഗനിർദേശിയും ഉപദേശകനുമായിരുന്നു.
ടെക്സസ് സർവകലാശാലയിലെ ഗണിത – കംപ്യൂട്ടറിന്‍റെ മേധാവിയായിരുന്നു. കാലടി ശ്രീശങ്കര കോളെജ്, ഫാറൂഖ് കോളജ്, വിസ്കോൺസിൻ സർവകലാശാല, ഇല്ലിനോയ് സർവകലാശാല എന്നിവിടങ്ങളിൽ അധ്യാപകനായി സേവനം അനുഷ്ഠിച്ചിട്ടുണ്ട്.
എൻ.വി.കൃഷ്ണവാരിയരുടെയും വിഷ്ണുനാരായണൻ നമ്പൂതിരിയുടെയും ഉറ്റ സുഹൃത്തായിരുന്നു. “പ്രവാസിയുടെ തേങ്ങൽ” എന്ന കവിതാസമാഹാരം പ്രസിദ്ധീകരിച്ചിട്ടുണ്ട്.
