ന്യൂജഴ്‌സി: മിഡ്‌ലാൻഡ് പാർക്ക് സെന്‍റ് സ്റ്റീഫൻസ് മലങ്കര ഓർത്തഡോക്സ് ദേവാലയത്തിന്‍റെ 40-ാം വാർഷികാഘോഷം ഞായറാഴ്ച വിപുലമായ പരിപാടികളോടെ സംഘടിപ്പിക്കുന്നു
ശനിയാഴ്ച വൈകുന്നേരം ആറിന് മലങ്കര ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മാർത്തോമ്മാ മാത്യൂസ് തൃതീയൻ ബാവയുടെ മഹനീയ സാന്നിധ്യത്തിൽ ആരംഭിക്കുന്ന സന്ധ്യ പ്രാർഥനയോടെ വാർഷികാഘോഷങ്ങൾക്കു തിരശീല ഉയരും.
ഞായറാഴ്ച രാവിലെ 8.15ന് പരിശുദ്ധ ബാവ തിരുമേനിയുടെ മുഖ്യകാർമീകത്വത്തിലുള്ള വിശുദ്ധ കുർബാനയിൽ നോർത്ത് ഈസ്റ്റ് അമേരിക്കൻ ഭദ്രാസന മെത്രാപ്പോലീത്ത സഖറിയ മാർ നിക്കോളോവോസ് തിരുമേനിയുടെ അനുഗ്രഹീത സാന്നിധ്യവും ഉണ്ടായിരിക്കും.
വിശുദ്ധ കുർബാനയ്ക്ക് ശേഷം ദേവാലയത്തിലെ നാൽപ്പതാം വാർഷികാഘോഷതോടനുബന്ധിച്ചു സംഘടിപ്പിച്ചിട്ടുള്ള പൊതുയോഗത്തിൽ നിരവധി പൗരപ്രമുഖരും സഭാനേതാക്കളും പങ്കെടുക്കും.
സെന്‍റ് സ്റ്റീഫൻസ് മലങ്കര ഓർത്തഡോക്സ് ദേവാലയത്തിന്‍റെ ഭക്തി നിർഭരമായ നാൽപ്പത് വർഷത്തെ പ്രയാണത്തിലെ സുപ്രധാന ഏടുകളെ കോർത്തിണക്കി, ഒട്ടനവധി വിജ്ഞാനപ്രദമായ ലേഖനങ്ങളാൽ സമ്പന്നമായ സുവനീറിന്‍റെ പ്രകാശനവും ചടങ്ങിന്‍റെ ഭാഗമായി സംഘടിപ്പിച്ചിട്ടുണ്ട്.
ദേവാലയത്തിലെ എല്ലാ മെമ്പർമാരുടെ വിവരങ്ങൾ ഉൾപ്പെടുത്തിയ ഡയറക്ടറി പ്രകാശനവും ചടങ്ങിന്‍റെ ഭാഗമായി നടക്കും. 1984ൽ സ്ഥാപിതമായ ദേവാലയത്തിന്‍റെ ആരംഭം മുതൽക്കേ പള്ളിയുടെ അഭിഭാജ്യ ഘടകമായി നിലകൊള്ളുന്ന ഫൗണ്ടിംഗ് മെമ്പേഴ്സിനെ ആദരിക്കുന്ന അനുഗ്രഹപ്രധാനമായ ചടങ്ങും വാർഷികാഘോഷതോടനുബന്ധിച്ചു നടത്തപ്പെടും
ദേവാലയത്തിന്‍റെ നാൽപതു വർഷത്തെ അനുഗ്രഹഹീത യാത്രയിൽ ലഭിച്ച പോരുന്ന അളവറ്റ ദൈവീക കൃപാകടാക്ഷങ്ങളെ അനുസ്മരിച്ചു പള്ളി വികാരി റവ. ഫാ. ഡോ ബാബു കെ. മാത്യു ഇടവക അംഗങ്ങളുടെ പരിപൂർണ പിന്തുണയേയും സഹകരണത്തെയും പ്രത്യേകം പരാമർശിച്ചു.
ബാവ തിരുമേനിയെയും വിശിഷ്ടാതിഥികളെയും വരവേൽക്കുവാനും മറ്റു കാര്യപരിപാടികളുടെ ഒരുക്കങ്ങളും റവ. ഫാ. ഡോ. ബാബു കെ.മാത്യുവിന്‍റെയും കമ്മിറ്റി അംഗങ്ങളുടെയും നേതൃത്വത്തിൽ പുരോഗമിക്കുന്നു.
റവ. ഫാ. ഡോ. ബാബു കെ. മാത്യു, ജനറൽ കൺവീനർ ജോബി ജോൺ, കോഓർഡിനേറ്റർ അജു തര്യൻ, സെക്രട്ടറി ജെറീഷ് വർഗീസ്, ട്രഷറർ ജോസ് തോമസ് , സുവനീർ ചീഫ് എഡിറ്റർ എബി തര്യൻ എന്നിവരാണ് വാർഷികാഘോഷങ്ങളുടെ വിജയത്തിനായി ചുക്കാൻ പിടിക്കുന്നത്.
