എഡ്മിന്‍റൺ: കാനഡയിലെ ആൽബർട്ടയിൽ എഡ്മിന്‍റൺ ആസ്ഥാനമായുള്ള നോർത്തേൺ ആൽബർട്ട മലയാളി ഹിന്ദു അസോസിയേഷൻ 2024ലെ പ്രത്യേക വാർഷിക പൊതുയോഗത്തിൽ പുതിയ ഭാരവാഹികളെ തെരഞ്ഞെടുത്തു.
ദിനേശ് രാജൻ (പ്രസിഡന്‍റ്), സിദ്ധാർഥ് ബാലൻ (വൈസ് പ്രസിഡന്‍റ്), അജയ് കുമാർ .കെ (സെക്രട്ടറി), പ്രജീഷ് നാരായണൻ (ജോയിന്‍റ് സെക്രട്ടറി), ഡാക്സ് വിജയഭാനു (ട്രെഷറർ), വിബിൻകുമാർ നെല്ലിശേരി, അരുൺ രാമചന്ദ്രൻ, റിമ പ്രകാശ്, നീതു ഡാക്സ് (ബോർഡ് അംഗങ്ങൾ) എന്നിവരാണ് ഭാരവാഹികൾ.
മാതൃസമിതി കോഓർഡിനേറ്ററായി ജോത്സ്ന സിദ്ധർഥിനെയും മാതൃസമിതി വൈസ് കോഓർഡിനേറ്ററായി സുഷമ ദിനേശിനേയും തെരഞ്ഞെടുത്തു. കാനഡ ഫെഡറൽ ഗവൺമെന്‍റ് ഒരു ചാരിറ്റബിൾ ഓർഗനൈസേഷനായി നമാഹായെ അംഗീകരിച്ചതിനു ശേഷമുള്ള പൊതുയോഗത്തിൽ 2024ൽ കൈവരിച്ച പ്രധാന നേട്ടങ്ങളേയും പ്രവർത്തനങ്ങളേയും വിലയിരുത്തി.
ഒപ്പം 2024 വർഷത്തെ സാമ്പത്തിക കണക്കുകളും അവതരിപ്പിക്കപ്പെട്ടു. എല്ലാ അംഗങ്ങളും എത്തിയ ചടങ്ങിൽ പ്രത്യേക പ്രമേയത്തിലൂടെ പുതിയ നിയമഭേദഗതികൾ പാസാക്കി. കാനഡ ഗവൺമെന്‍റ് അംഗീകൃത ചാരിറ്റബിൾ ഓർഗനൈസേഷൻ എന്ന നിലയിലുള്ള എല്ലാ നയങ്ങളും മാനദണ്ഡങ്ങളും പൂർണമായി പാലിക്കാൻ പ്രതിജ്ഞാബദ്ധരാണെന്ന് പുതിയ ഭാരവാഹികൾ അറിയിച്ചു.
കുട്ടികളും മുതിർന്നവരും സന്നിഹിതരായ ചടങ്ങിൽ നമഹയുടെ 2025ൽ നടപ്പാക്കേണ്ട കാര്യങ്ങളുടെ ചെറിയ രൂപരേഖ ദിനേഷ് രാജൻ അവതരിപ്പിച്ചു. കൂടാതെ അജയ് കുമാർ നമഹാ വിഷൻ 2030 എന്ന മഹത്തരമായ ആശയം അവതരിപ്പിക്കുകയും എല്ലാ അംഗങ്ങളും അംഗീകരിക്കുകയും ചെയ്തു.
ഒരു ഹിന്ദു സംഘടന എന്ന രീതിയിൽ കൂടുതൽ ആഴങ്ങളിലേക്ക് പ്രവർത്തനം വ്യാപിപ്പിക്കലാണ് നമഹാ വിഷൻ 2030. ഇതിന്‍റെ പ്രവർത്തനം ഏകികരിപ്പിക്കാൻ വേണ്ടി സിദാർഥ് ബാലൻറെയും പ്രജീഷ് നാരായണന്‍റെയും നേതൃത്വത്തിൽ ഒരു കോർ കമ്മിറ്റിക്ക് രൂപം നല്കാൻ തീരുമാനിച്ചു.
നമഹയുടെ കുരുന്ന് കുട്ടികൾ അവതരിപ്പിച്ച കലാപരിപാടികളോട് കൂടി വാർഷിക പൊതുയോഗം സമാപിച്ചു.
