മലപ്പുറത്ത് നിപ മരണം രേഖപ്പെടുത്തിയതിന് പിന്നാലെ സമ്പർക്ക പട്ടികയിലുള്ളവരുടെ എണ്ണത്തിൽ വർധന. നിലവിൽ 255 പേരെയാണ് പട്ടികയിലുൾപ്പെടുത്തി. രോഗ ബാധയെ തുടർന്ന് മേഖലയിൽ ശക്തമായ നിരീക്ഷണം നടക്കുന്നത് കൊണ്ടാണ് ഈ വർധനവെന്നും ആശങ്കപ്പെടാനില്ലെന്നും ആരോഗ്യമന്ത്രി വാർത്താ സമ്മേളനത്തിൽ അറിയിച്ചു. 255 പേരടങ്ങുന്ന സമ്പർക്ക പട്ടികയിൽ 32 പേർ ഹൈ റിസ്ക് കാറ്റഗറിയിലാണ്. ഇവരിൽ മൂന്ന് പേരുടെ സാമ്പിളുകൾ പരിശോധനക്ക് അയച്ചിട്ടുണ്ടെന്നും മന്ത്രി വ്യക്തമാക്കി.
സമ്പർക്കപ്പട്ടികയിലുള്ളവരുടെ എണ്ണം വർദ്ധിപ്പിച്ചത് രോഗവ്യാപനത്തിൻ്റെ എല്ലാ സാധ്യതകളും തടയാനാണ്. കണക്കുകളിൽ ആശങ്കപ്പെടേണ്ട സാഹചര്യമില്ല. ഹൈറിസ്ക് കാറ്റഗറി അവ നേരിട്ടുള്ള സമ്പർക്കം വന്നവരുടെ എണ്ണം ഇതിൽ 32 മാത്രമാണ്. 26 പേരെയാണ് ആദ്യം ഹൈറിസ്ക് കാറ്റഗറിയിൽ ഉൾപ്പെടുത്തിയിരുന്നത്. നിപയ്ക്ക് പുറമെ വിദേശത്ത് നിന്ന് മലപ്പുറത്തേയ്ക്ക് മടങ്ങിയെത്തിയ യുവാവിന് എം പോക്സ് (മങ്കി പോക്സ്) രോഗ ലക്ഷണം കണ്ടെത്തിയതും ആശങ്കയാകുകയാണ്. രോഗം സ്ഥിരീകരിച്ചാൽ രാജ്യത്തെതന്നെ ആദ്യത്തെ കേസ് ഇതാകും.
കഴിഞ്ഞദിവസമാണ് മലപ്പുറത്ത് നിപ സ്ഥിരീകരിച്ചത്. ഉടൻ തന്നെ പ്രോട്ടോകോൾ നടപടികൾ സ്വീകരിച്ചിട്ടുണ്ടെന്നും ആശങ്കപ്പെടേണ്ട സാഹചര്യം ഇല്ലെന്നും മന്ത്രി വീണാ ജോർജ് അറിയിച്ചു. രോഗവ്യാപനം ഇല്ലെന്ന് ഉറപ്പാക്കാനാണ് ശ്രമം. രോഗവ്യാപനത്തിന് സാധ്യത കുറവാണെങ്കിലും ലക്ഷണമുള്ള മുഴുവൻ ആളുകളുടെയും സാമ്പിളുകൾ പരിശോധിക്കും. മരിച്ച യുവാവ് ബാംഗ്ലൂരിലാണ് പഠിച്ചത്. കർണാടക സർക്കാരുമായി ആശയവിനിമയം നടത്തിയിട്ടുണ്ടെന്നും മന്ത്രി പറഞ്ഞു.
