നൈജീരിയയിലെ യോല കത്തോലിക്കാ രൂപതയിൽ നിന്ന് തട്ടിക്കൊണ്ടുപോകപ്പെട്ട ഫാ. മാത്യു ഡേവിഡ് ഡട്സെമി, ഫാ. എബ്രഹാം സൗമ്മം എന്നിവരെ രക്ഷപ്പെടുത്തിയതായി നൈജീരിയൻ രൂപത ഔദ്യോഗികമായി സ്ഥിരീകരിച്ചു. ഫെബ്രുവരി 22 നായിരുന്നു ഇരുവരെയും തട്ടിക്കൊണ്ടു പോയത്.
നൈജീരിയയിലെ അഡമാവാ സ്റ്റേറ്റിലെ ഡെംസ ലോക്കൽ ഗവൺമെന്റ് ഏരിയയിൽ സ്ഥിതിചെയ്യുന്ന ഗ്വേദ-മല്ലത്തിലെ വൈദിക റെക്ടറിയിൽ നിന്നാണ് രണ്ടു വൈദികരും തട്ടിക്കൊണ്ടു പോകപ്പെട്ടത്. ആയുധധാരികൾ ഇടവകയുടെ റെക്ടറിയിലെത്തി വൈദികരെ തട്ടിക്കൊണ്ടു പോകുകയായിരുന്നു. യോല രൂപതാ ബിഷപ്പ് സ്റ്റീഫൻ ഡാമി മംസ, തട്ടിക്കൊണ്ടുപോയ രണ്ട് കത്തോലിക്കാ പുരോഹിതന്മാരെ രക്ഷപ്പെടുത്തിയതായി സർവശക്തനായ ദൈവത്തോടുള്ള ഹൃദയം നിറഞ്ഞ സന്തോഷത്തോടെയും നന്ദിയോടെയും അറിയിച്ചു.
“സ്റ്റേറ്റ് സെക്യൂരിറ്റി സർവീസ് വകുപ്പിന്റെയും (ഡി എസ് എസ് എസ്) പ്രാദേശിക ജാഗ്രതാ ഗ്രൂപ്പിന്റെയും സംയോജിത ശ്രമത്തിന്റെ ഫലമായാണ് അവരെ മോചിപ്പിക്കുന്നതിനുള്ള രക്ഷാപ്രവർത്തനം നടന്നത്. നമ്മുടെ പുരോഹിതന്മാരെ തട്ടിക്കൊണ്ടുപോയത് വളരെ ദുഃഖകരമായ ഒരു സംഭവമായിരുന്നു, എന്നാൽ നമ്മുടെ രൂപതകളിലും പുറത്തുമുള്ള സുരക്ഷാ പ്രവർത്തകർ, പ്രാദേശിക അധികാരികൾ, വ്യക്തികൾ, വിശ്വാസ സമൂഹങ്ങൾ, സംഘടനകൾ എന്നിവ കാണിച്ച സ്നേഹത്തിനും പരിശ്രമങ്ങൾക്കും നന്ദി-” ബിഷപ്പ് മംസ പറയുന്നു.
