യാത്രകൾ ഇഷ്‌ടമല്ലാത്തവർ വളരെ കുറവാണ്. പ്രത്യേകിച്ച് അവധിക്കാലം വരുന്നതിനാൽ യാത്രകൾ പോകാനുള്ള തയ്യാറെടുപ്പിലാകും ഭൂരിഭാഗംപേരും. അങ്ങനെ പോകാൻ പറ്റിയതും അധികം അറിയപ്പെടാത്തതുമായ കേരളത്തിലെ ഒരു സ്ഥലം പരിചയപ്പെടാം. കാസർകോട് ജില്ലയിൽ പശ്ചിമഘട്ടത്തിന്റെ പച്ചപ്പ് നിറഞ്ഞ റാണിപുരമാണ് ഈ സ്ഥലം. പ്രകൃതി സ്‌നേഹികൾക്കും സാഹസിക സഞ്ചാരികൾക്കും ഒരുപോലെ ഇഷ്‌ടമാകുന്ന ഇവിടം മറ്റ് മലനിരകളിൽ നിന്നും വ്യത്യസ്‌തമാണ്.
വെല്ലുവിളി നിറഞ്ഞ ട്രക്കിംഗും അതിമനോഹരമായ കാഴ്‌ചകളും മനുഷ്യന്റെ കാൽപ്പാദം പതിയാത്ത കാടുകളും ചേർന്ന അപൂർവ കാഴ്‌ചയാണ് ഇവിടെയുള്ളത്. പരന്നുകിടക്കുന്ന പുൽമേടുകൾ, നിത്യഹരിത ചോല വനങ്ങൾ, വടവൃക്ഷങ്ങൾ എന്നിവയും ഇവിടെ കാണാം. മൺസൂൺ കാലത്ത് പച്ചപ്പ് നിറഞ്ഞ് റാണിപുരം സ്വർഗമായി മാറും.
ഇവിടേക്ക് എത്തിച്ചേരുന്നതു തന്നെ സാഹസികമായാണ്. കാഞ്ഞങ്ങാട് നിന്നും ഏകദേശം 45 കിലോമീറ്റർ അകലെയാണ് ഇവിടം സ്ഥിതി ചെയ്യുന്നത്. കാഞ്ഞങ്ങാട്ടിൽ നിന്നുള്ള ബസ് സർവീസ് ജില്ലാ ടൂറിസം പ്രമോഷൻ കൗൺസിൽ (ഡിടിപിസി) ഓഫീസിൽ നിങ്ങളെ എത്തിക്കും. അവിടെ നിന്നാണ് ട്രക്കിംഗ് ആരംഭിക്കുന്നത്. നല്ല താമസ സൗകര്യം തേടുന്നവർക്ക്, ഡിടിപിസി കോട്ടേജുകൾ ഉപയോഗിച്ച് ഉന്മേഷത്തോടെ ട്രെക്കിനായി തയ്യാറെടുക്കാം.
അപൂർവയിനം പക്ഷികളെയും സസ്യജാലങ്ങളെയും കണ്ടും പരിചയപ്പെട്ടും പോകുന്ന യാത്രയാണിത്. വെല്ലുവിളി നിറഞ്ഞ ട്രക്കിംഗ് പ്രകൃതിയെ ആഴത്തിൽ മനസിലാക്കാൻ സഹായിക്കും. ഏറെ നടക്കാനുള്ളതിനാൽ മറ്റ് ആരോഗ്യപ്രശ്‌നങ്ങൾ ഇല്ലാത്തവർക്ക് ഇവിടേക്ക് യാത്ര തിരിക്കാം.
