ഷാരോൺ വധക്കേസിൽ ഇന്ന് കേരള മനസാക്ഷി കാത്തിരുന്ന ശിക്ഷാവിധിയാണ് പുറത്തുവന്നത്. പ്രണയം നടിച്ച് നിർദാക്ഷണ്യം തൻ്റെ മകനെ കൊന്നുകളയാൻ തീരുമാനിച്ച ഗ്രീഷ്മയുടെ ശിക്ഷാ വിധികേട്ട് പൊട്ടക്കരഞ്ഞ ഒരമ്മയുണ്ട് ആ കോടതിമുറിയിൽ. മകന് നീതി ഉറപ്പാക്കിയ ആ നീതിമാനായ ജഡ്ജിയെ ദൈവതുല്യം കാണുന്നു എന്നാണ് മാധ്യമങ്ങളോട് ആ അമ്മ പ്രതികരിച്ചത്.
‘നിഷ്കളങ്കനായ എൻ്റെ പൊന്നുമോൻ്റെ നിലവിളി ദൈവം കേട്ടു. ദൈവം നീതിമാനായ ജഡ്ജിയുടെ രൂപത്തിൽ ഇറങ്ങി വന്ന് വിധി പറഞ്ഞു. വിധിയിൽ സംതൃപ്തരാണ്.’ ചങ്കുപിടയുന്ന വേദനയിലും ഷാരോണിൻ്റെ അമ്മയുടെ പ്രതികരണം ഇത്തരത്തിലായിരുന്നു. പ്രോസിക്യൂഷനും പോലീസിനും നന്ദി പറയുന്നുവെന്നും കോടതിയോട് എന്നും കുടുംബം നന്ദിയുള്ളവരായിരിക്കുവെന്നും ഷാരോണിൻ്റെ അമ്മാവനും പ്രതികരിച്ചു.
തനിക്ക് വധശിക്ഷ വിധിക്കുന്നത് കേട്ടിട്ടും ഭാവവ്യത്യാസങ്ങളൊന്നും ഇല്ലാതിരുന്ന ഗ്രീഷ്മയുടെ നിർവികാരതയാണ് എല്ലാവരേയും ഞെട്ടിക്കുന്നത്. ഗ്രീഷ്മ നടത്തിയത് സമര്‍ത്ഥമായ കുറ്റകൃത്യമെന്ന് കോടതി വിലയിരുത്തി. ഗ്രീഷ്മയ്ക്ക് പ്രായത്തിൻ്റെ ഇളവ് നല്‍കണമെന്ന് പ്രതിഭാഗം ആവശ്യപ്പെട്ടിരുന്നെങ്കിലും കോടതി നിരീക്ഷിച്ചു. പ്രതിയുടെ പ്രായം പരിഗണിക്കാൻ കഴിയില്ലെന്നും പ്രകോപനമില്ലാതെയുള്ള കൊലപാതകമാണിതെന്നും വ്യക്തമാക്കിക്കൊണ്ടാണ് നെയ്യാറ്റിന്‍കര സെഷന്‍സ് കോടതി ശിക്ഷ വിധിച്ചത്.
