ദുബായ്: യുഎഇ പതുക്കെ തണുപ്പ് കാലത്തിലേക്ക് കടക്കുമ്പോള്‍, ശൈത്യകാല ടെന്റുകളും ബാര്‍ബിക്യുകളുമായി ആസ്വദിക്കാനുള്ള ഒരുക്കത്തിലാണ് യുഎഇയിലെ സ്വദേശികളും പ്രവാസികളും ഉള്‍പ്പെടുന്ന താമസക്കാര്‍. പ്രാദേശിക പാര്‍ക്കുകളിലും തടാകങ്ങളിലും ബീച്ചുകളിലും രാത്രി ചെലവഴിച്ച് ബാര്‍ബിക്യൂകള്‍ സ്ഥാപിക്കുന്നതാണ് പതിവ് രീതി. എന്നാല്‍ ഗ്രില്‍ഡ് ചിക്കനുകളും മറ്റും ഉണ്ടാക്കുന്നതിനുള്ള അടുപ്പുകള്‍ സ്ഥാപിക്കുമ്പോള്‍ ശ്രദ്ധയോടെ വേണമെന്ന് അധികൃതര്‍ ഓര്‍മിപ്പിച്ചു.
ബാര്‍ബിക്യുവുമായി ബന്ധപ്പെട്ട നിയന്ത്രണം ഓരോ എമിറേറ്റിനും വ്യത്യസ്തമാണ്. എന്നിരുന്നാലും യുഎഇയിലുടനീളം പൊതു പാര്‍ക്കുകള്‍ സാധാരണയായി ബാര്‍ബിക്യൂ ചെയ്യുന്നതിനായി പ്രത്യേക സോണുകള്‍ വാഗ്ദാനം ചെയ്യുന്നുണ്ട്. ഇത്തരം നിയുക്ത ഇടങ്ങളില്‍ മാത്രമേ അടുപ്പുകള്‍ കൂട്ടാവൂ എന്ന് അധികൃതര്‍ അറിയിച്ചു. സുരക്ഷ ഉറപ്പാക്കുന്നതിനും ശുചിത്വം നിലനിര്‍ത്തുന്നതിനും പരിസ്ഥിതിയെയും പ്രാദേശിക വന്യജീവികളെയും സംരക്ഷിക്കുന്നതിനും ഇത് അത്യന്താപേക്ഷിതമാണ്.
ബാര്‍ബിക്യൂ ആസൂത്രണം ചെയ്യുമ്പോള്‍, പൊതു പാര്‍ക്കുകളിലെ അടയാളങ്ങള്‍ ശ്രദ്ധിക്കുക. അബൂദാബി, ദുബായ്, ഷാര്‍ജ എന്നിവിടങ്ങളിലെ മുനിസിപ്പാലിറ്റികള്‍ ബാര്‍ബിക്യൂ ചെയ്യാനും ഗ്രില്ലിംഗിനും അനുവദനീയമായ പ്രത്യേക പ്രദേശങ്ങള്‍ നിശ്ചയിച്ചിട്ടുണ്ട്. മറ്റു സ്ഥലങ്ങളില്‍ ബാര്‍ബിക്യൂ ചെയ്ത് ഈ നിയമം ലംഘിച്ചാല്‍ 500 ദിര്‍ഹം പിഴ ലഭിക്കും. എന്നു മാത്രമല്ല, ബാര്‍ബിക്യു ചെയ്യുന്ന സ്ഥലങ്ങളില്‍ ശുചിത്വം പാലിക്കലും പ്രധാനമാണ്. പൊതു പാര്‍ക്കുകള്‍, ബീച്ചുകള്‍, തടാകങ്ങള്‍ എന്നിവിടങ്ങളില്‍ നല്‍കിയിരിക്കുന്ന ബിന്നുകളില്‍ മാത്രമേ മാലിന്യങ്ങള്‍ നിക്ഷേപിക്കാവൂ. ദുബായില്‍ മാലിന്യ നിര്‍മാര്‍ജനത്തിനായി നിയുക്തമാക്കിയ സ്ഥലങ്ങളില്‍ ഒഴികെയുള്ള സ്ഥലങ്ങളില്‍ മാലിന്യം തള്ളുന്നത് എമിറേറ്റ്‌സിന്റെ എക്‌സിക്യൂട്ടീവ് കൗണ്‍സില്‍ പ്രമേയം അനുസരിച്ച് 1,000 ദിര്‍ഹം പിഴ ഈടാക്കാവുന്ന കുറ്റമാണ്.
പൊതു പാര്‍ക്കുകളില്‍ കാണപ്പെടുന്ന ഏറ്റവും സാധാരണമായ മാലിന്യങ്ങളില്‍ ഒന്നാണ് ബാര്‍ബിക്യുവിനായി ഉപയോഗിച്ച കരിയുടെ ചാരം. ഇത് ശരിയായ രീതിയില്‍ കൈകാര്യം ചെയ്തില്ലെങ്കില്‍ തീപ്പിടിത്തം ഉള്‍പ്പെടെയുള്ള അപകടങ്ങള്‍ക്കും പരിസ്ഥിതി മലിനീകരണത്തിന് കാരണമാവുമെന്ന് അധികൃതര്‍ അറിയിച്ചു. അതിനാല്‍ ബാര്‍ബിക്യു ചെയ്തു കഴിഞ്ഞാല്‍ ഉപയോഗിച്ച കരിയിലെ തീ വെള്ളം ഉപയോഗിച്ച് അണയ്ക്കണം.
