ദുബായ്: 2025 ജനുവരി 1 ബുധനാഴ്ച യുഎഇയിലെ സര്‍ക്കാര്‍ ജീവനക്കാര്‍ക്ക് പൊതു അവധിയായിരിക്കുമെന്ന് ഫെഡറല്‍ അതോറിറ്റി ഫോര്‍ ഗവണ്‍മെന്റ് ഹ്യൂമന്‍ റിസോഴ്സ് പ്രഖ്യാപിച്ചു. വരുന്ന വര്‍ഷത്തില്‍ രാജ്യത്തെ ആദ്യത്തെ പൊതു അവധിയായിരിക്കും ഇത്. ഈ വര്‍ഷം ആദ്യം പുറത്തിറക്കിയ രാജ്യത്തെ ഔദ്യോഗിക അവധി ദിനങ്ങളുടെ പട്ടികയ്ക്ക് അനുസൃതമായാണ് ഈ പ്രഖ്യാപനം.
2025ല്‍ താമസക്കാര്‍ക്ക് പൊതു അവധി ദിവസങ്ങളായി 13 ദിവസം വരെ ലഭിക്കും. യുഎഇ കാബിനറ്റ് പുറപ്പെടുവിച്ച പ്രമേയമനുസരിച്ച് ഇസ്ലാമിക ഉത്സവമായ ഈദ് അല്‍ ഫിത്തര്‍ അഥവാ ചെറിയ പെരുന്നാള്‍ അവധിയില്‍ അടുത്ത വര്‍ഷം ചില വ്യത്യസങ്ങളുണ്ടാവും. സമീപ വര്‍ഷങ്ങളെ അപേക്ഷിച്ച് പൊതു അവധി ദിവസങ്ങളിലെ ഏറ്റവും ശ്രദ്ധേയമായ മാറ്റമാണിത്.
റമദാന്‍ മാസത്തിന് ശേഷം വരുന്ന ഈദ് അല്‍ ഫിത്തറിന് താമസക്കാര്‍ക്ക് നാല് ദിവസമോ അതില്‍ കൂടുതലോ ആണ് സാധാരണ അവധി ലഭിക്കാറ്. എന്നാല്‍ ഈ വര്‍ഷത്തെ അവധിയില്‍ മാറ്റമുണ്ടായിരിക്കുമെന്ന് അധികൃതര്‍ അറിയിച്ചു. റമദാനിനെ തുടര്‍ന്നുള്ള മാസമായ ഷവ്വാലിന്റെ ആദ്യ മൂന്ന് ദിവസങ്ങള്‍ മാത്രമായിരിക്കും അവധി ദിവസങ്ങള്‍.
റമദാന്‍ 30 ദിവസം നീണ്ടുനില്‍ക്കുകയാണെങ്കില്‍, ഇസ്ലാമിക മാസത്തിലെ 30-ാം തീയതിയും അവധിയായിരിക്കും. അഥവാ താമസക്കാര്‍ക്ക് നാല് ദിവസത്തെ അവധി നല്‍കും (റമദാന്‍ 30 മുതല്‍ ശവ്വാല്‍ 3 വരെ). വിശുദ്ധ മാസം 29 ദിവസം മാത്രമേ ഉള്ളൂ എങ്കില്‍, അവധി ഈദിന്റെ ആദ്യ മൂന്ന് ദിവസങ്ങള്‍ മാത്രമായിരിക്കും (ശവ്വാല്‍ 1 മുതല്‍ 3 വരെ).
2024ല്‍ റമദാന്‍ 29 മുതല്‍ ഷവ്വാല്‍ 3 വരെയായിരുന്നു ഈദ് അല്‍ ഫിത്തര്‍ അവധി. വാരാന്ത്യങ്ങള്‍ ഉള്‍പ്പെടെ ഈ വര്‍ഷം താമസക്കാര്‍ക്ക് ഒൻപത് ദിവസത്തെ ഇടവേളയാണ് ചെറിയ പെരുന്നാളിന് ലഭിച്ചത്. പുതിയ അവധി കലണ്ടര്‍ പ്രകാരം ഇസ്ലാമിലെ ഏറ്റവും പുണ്യദിനമായി കണക്കാക്കുന്ന അറഫാ ദിനം അവധിയായിരിക്കും. ഇത് ദുല്‍ ഹിജ്ജ 9 ന് ആണ് വരുന്നത്. തുടര്‍ന്ന് ഇസ്ലാമിക ആഘോഷമായ ഈദ് അല്‍ അദ്ഹയ്ക്ക് (ദുല്‍ ഹിജ്ജ 10-12) മൂന്ന് ദിവസത്തെ ഇടവേള ഉണ്ടായിരിക്കും. വാരാന്ത്യ അവധി കൂടി പരിഗണിച്ചാല്‍ നാല് അവധി ദിവസങ്ങളായി മാറും.
