ദുബായ്: ദുബായിൽ നടന്ന ‘വൺ ബില്യൺ ഫോളോവേഴ്സ് സമ്മിറ്റിൽ’, യുഎഇയുടെ വൺ ബില്യൺ അവാർഡ് നേടിയത് ബ്രിട്ടീഷ് സംരംഭകനും പ്രചോദനാത്മക പ്രഭാഷകനും ഉള്ളടക്ക സ്രഷ്ടാവുമായ സൈമൺ സ്‌ക്വിബ്ബിന്. 10 ലക്ഷം ഡോളറാണ് സമ്മാനത്തുക. വൺ ബില്യൺ ഫോളോവേഴ്സ് ഉച്ചകോടിയുടെ അവസാന ദിവസമായ തിങ്കളാഴ്ച ദുബായ് കൾച്ചർ ആൻഡ് ആർട്സ് അതോറിറ്റി ചെയർപേഴ്സൺ ഷെയ്ഖ ലത്തീഫ ബിൻത് മുഹമ്മദ് ബിൻ റാഷിദ് അൽ മക്തൂമാണ് അവാർഡ് ജോതാവായി സ്‌ക്വിബിനെ പ്രഖ്യാപിച്ചത്.
തങ്ങളുടെ ഡിജിറ്റൽ ഉള്ളടക്കത്തിലൂടെ സമൂഹത്തിൽ പോസിറ്റീവ് മുദ്ര പതിപ്പിക്കുകയും സമൂഹങ്ങളെ മികവിലേക്ക് നയിക്കുകയും മനസ്സുകളെ പ്രചോദിപ്പിക്കുകയും രാഷ്ട്രങ്ങളെ അടുപ്പിക്കുകയും കാരുണ്യത്തിന്റെയും സഹാനുഭൂതിയുടെയും മൂല്യങ്ങൾ പകർന്നു നൽകുകയും ചെയ്യുന്നവരെ പ്രോത്സാഹിപ്പിക്കുകയെന്ന ലക്ഷ്യത്തോടെ യുഎഇ നൽകുന്ന ഈ വൺ ബില്യൺ അവാർഡ്, കണ്ടന്റ് ക്രിയേറ്റർമാർക്ക് ലോകത്ത് നൽകുന്ന ഏറ്റവും വലിയ അവാർഡായാണ് കണക്കാക്കപ്പെടുന്നത്.
16,000 അപേക്ഷകരെ പിന്തള്ളിയാണ് സ്‌ക്വിബ് വൺ ബില്യൺ അവാർഡ് സ്വന്തമാക്കിയത്. പൊതു വോട്ടെടുപ്പ് സംവിധാനത്തിലൂടെ തിരഞ്ഞെടുക്കപ്പെട്ട ആദ്യ അഞ്ച് മത്സരാർഥികളിൽ ഒരാളായിരുന്നു അദ്ദേഹം. ലോകമെമ്പാടുമുള്ള 33 ലക്ഷം വോട്ടുകൾ നേടിയാണ് അദ്ദേഹം വിജയിച്ചത്. 15 വയസ്സുള്ള ഒരു വീടില്ലാത്ത, ഡിസ്ലെക്‌സിയ ബാധിച്ച കുട്ടിയിൽ നിന്ന് പ്രചോദനാത്മകമായ ഒരു ആഗോള നേതാവിലേക്കുള്ള സ്‌ക്വിബിന്റെ യാത്ര ശരിക്കും പ്രചോദനാത്മകമാണെന്ന് അവാർഡ് നിർണയിച്ച ജഡ്ജിമാർ അഭിപ്രായപ്പെട്ടു.
സമൂഹമാധ്യമ അക്കൗണ്ടുകളിൽ 11 ദശലക്ഷത്തിലധികം ഫോളോവേഴ്സ് സ്‌ക്വിബ്ബിനുണ്ട്. 10 ദശലക്ഷം വ്യക്തികളെ അവരുടെ ബിസിനസുകൾ ആരംഭിക്കാനും അവരുടെ സ്വപ്നങ്ങൾ സാക്ഷാത്കരിക്കാനും സഹായിക്കുക എന്ന ദൗത്യത്തിലാണ് അദ്ദേഹം. അദ്ദേഹത്തിന്റെ കണ്ടന്റുകൾ 2024ൽ 100 കോടി കാഴ്ചകളിൽ എത്തി. സ്‌ക്വിബ് നേരിട്ട് 1,000ത്തിലധികം ആളുകളെ സഹായിക്കുകയും ലോകമെമ്പാടുമുള്ള ദശലക്ഷക്കണക്കിന് ആളുകളെ തന്റെ ഉള്ളടക്കത്തിലൂടെ ശാക്തീകരിക്കുകയും ചെയ്തിട്ടുണ്ടെന്നും അധികൃതർ അറിയിച്ചു.
തന്റെ വ്യക്തിപരമായ അനുഭവങ്ങൾ പങ്കുവെക്കുന്നതിലൂടെ വ്യക്തികൾക്ക് അവരുടെ പ്രശ്നങ്ങൾ തരണം ചെയ്യാനും അവരുടെ സ്വപ്നങ്ങൾ സാക്ഷാത്കരിക്കാനും സഹായിച്ചുവരുന്നു. ഭാവി നേതാക്കളെ പ്രചോദിപ്പിക്കുന്നതിൽ അദ്ദേഹം ശ്രദ്ധ കേന്ദ്രീകരിക്കുകയും ആഗോള പ്രശ്നങ്ങൾ അഭിസംബോധന ചെയ്യുന്ന സാമൂഹിക സംരംഭങ്ങളെ പിന്തുണയ്ക്കുകയും ചെയ്യുന്നു. ‘വാട്ട്‌സ് യുവർ ഡ്രീം?’ എന്ന പ്രശസ്ത പുസ്തകത്തിന്റെ രചയിതാവ് കൂടിയാണ് സ്‌ക്വിബ്, വിദ്യാഭ്യാസത്തിൽ വിപ്ലവം സൃഷ്ടിക്കുന്നതിൽ അഭിനിവേശമുള്ള സ്‌ക്വിബ്, സംരംഭകർക്ക് ധനസഹായം നൽകുന്നതിനും ലോകമെമ്പാടുമുള്ള പ്രേക്ഷകരെ പ്രചോദിപ്പിക്കുന്നതിനായി തന്റെ ഉള്ളടക്കം വികസിപ്പിക്കുന്നതിനുമായി ഒരു ആഗോള പ്ലാറ്റ്ഫോം സൃഷ്ടിക്കുക എന്നതാണ് ലക്ഷ്യമിടുന്നത്.
സമ്മാനത്തുകയായ 10 ലക്ഷം ഡോളർ സമ്മാനം ലഭിച്ചാൽ അതുകൊണ്ട് എന്തുചെയ്യുമെന്ന ജൂറിയുടെ ചോദ്യത്തിന് മറുപടിയായി സ്‌ക്വിബ് പറഞ്ഞതിങ്ങനെ: ”ഞാൻ ചെയ്യുന്നത് ഞാൻ തുടരും, അതായത് ആളുകളുടെ സ്വപ്നങ്ങൾ കേൾക്കുകയും അവയെ പ്രോത്സാഹിപ്പിക്കുകയും ചെയ്യുക, ആളുകളെ സ്വയം വിശ്വസിക്കാൻ സഹായിക്കുക, ആളുകൾക്ക് ഇഷ്ടമുള്ളത് ചെയ്യാൻ അവർക്ക് ആവശ്യമായ ഉപകരണങ്ങൾ സൗജന്യമായി ലഭ്യമാക്കുക”.
ഗാസയിൽ നിന്നുള്ള മഹ്മൂദ് സുവൈറ്റർ, ‘ഡ്യൂപാമിക്കഫീൻ സയൻസസ്’ ചാനലിലൂടെ സങ്കീർണമായ പുസ്തകങ്ങളും ആശയങ്ങളും ലളിതമാക്കുന്ന സൗദി അറേബ്യൻ സ്രഷ്ടാവ് നാസർ അൽ-ഒഖൈൽ, കുടിയിറക്കപ്പെട്ട കുടുംബങ്ങളെ സഹായിക്കുന്നതിലും സമൂഹങ്ങൾ പുനർനിർമ്മിക്കുന്നതിലും ശ്രദ്ധ കേന്ദ്രീകരിക്കുന്ന നാല് ലെബനീസ് ഇൻഫ്‌ളുവൻസർമാരുടെ കൂട്ടായ്മയായ ക്രിയേറ്റേഴ്സ് ഫോർ ലെബനൻ, കാരുണ്യ പ്രവർത്തനങ്ങളിലൂടെ പോസിറ്റീവിറ്റി പ്രചരിപ്പിക്കുന്ന ഓസ്ട്രേലിയക്കാരൻ സാമുവൽ വീഡൻഹോഫർ എന്നിവരാണ് മറ്റ് നാലു ഫൈനലിസ്റ്റുകൾ.
