അബുദാബി: യുഎഇയില്‍ ചൂടേറിയ കാലാവസ്ഥയില്‍ നിന്ന് മഞ്ഞില്‍ പുതഞ്ഞ തണുപ്പുകാലത്തിലേക്കുള്ള കാലാവസ്ഥാ മാറ്റത്തിന് തുടക്കമായി. കഴിഞ്ഞ ഏതാനും ദിവസങ്ങളിലായി രാജ്യത്തിന്റെ വിവിധ ഭാഗങ്ങളില്‍ ശക്തമായ മൂടല്‍ മഞ്ഞ് അനുഭവപ്പെടുന്നുണ്ട്. മൂടല്‍മഞ്ഞ് കൂടുതല്‍ ശക്തിയാര്‍ജിച്ചു വരുന്ന സാഹചര്യത്തില്‍ നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) ഇന്ന് വെള്ളിയാഴ്ച റെഡ് അലര്‍ട്ട് പ്രഖ്യാപിച്ചതായി അധികൃതര്‍ അറിയിച്ചു.
മൂടല്‍ മഞ്ഞ് ശക്തമായ സാഹചര്യത്തില്‍ അന്തരീക്ഷത്തിലെ തിരശ്ചീനമായ ദൃശ്യപരത വലിയ തോതില്‍ കുറഞ്ഞിട്ടുണ്ട്. മൂടല്‍ മഞ്ഞു കാരണം തൊട്ടടുത്തുള്ള വസ്തുക്കള്‍ പോലും കാണാന്‍ കഴിയാത്ത സ്ഥിതി ചിലയിടങ്ങളില്‍ റിപ്പോര്‍ട്ട് ചെയ്യപ്പെട്ടിട്ടുണ്ടെന്നും അധികൃതര്‍ വ്യക്തമാക്കി. പ്രത്യേകിച്ച് ചില തീരപ്രദേശങ്ങളിലും ഉള്‍നാടന്‍ പ്രദേശങ്ങളിലും രാവിലെ ഒന്‍പത് മണിക്കു ശേഷവും കട്ടിയായ മൂടല്‍ മഞ്ഞ് നിലനില്‍ക്കുന്ന സാഹചര്യമുണ്ട്. ഇതുമായി ബന്ധപ്പെട്ട്് സ്റ്റോം സെന്റര്‍ ഓണ്‍ലൈനില്‍ പോസ്റ്റ് ചെയ്ത വീഡിയോയില്‍ അബുദാബിയിലെ റോഡുകള്‍ കനത്ത മൂടല്‍മഞ്ഞ് പുതച്ചുകിടക്കുന്നത് കാണാം.
ഇതേത്തുടര്‍ന്ന് പലയിടങ്ങളിലും വാഹനങ്ങളുടെ വേഗപരിധി അധികൃതര്‍ കുറച്ചിട്ടുണ്ട്. വാഹനം ഓടിക്കുന്നവര്‍ തൊട്ടുമുമ്പിലെ വാഹനങ്ങളുമായി കൃത്യമായ അകലം പാലിക്കണമെന്നും അല്ലാത്ത പക്ഷം വലിയ അപകടങ്ങള്‍ക്ക് അത് കാരണമാവുമെന്നും അധികൃതര്‍ വ്യക്തമാക്കി. മൂടല്‍മഞ്ഞില്‍ ദൂരക്കാഴ്ച കുറയുന്നതിനാല്‍ വാഹനമോടിക്കുന്നവര്‍ ജാഗ്രത പാലിക്കണമെന്ന് എക്സിലെ ഒരു പോസ്റ്റില്‍ അബുദാബി പോലീസ് ആവശ്യപ്പെട്ടു.
യുഎഇ ശൈത്യകാലത്തേക്ക് മാറുമ്പോള്‍, താപനില കുറയുന്നതിനാല്‍ കാലാവസ്ഥ സുഖകരമാകാന്‍ തുടങ്ങുമെന്ന് ദേശീയ കാലാവസ്ഥാ കേന്ദ്രം അറിയിച്ചു. ഇന്നലത്തെ പരമാവധി താപനില 38 ഡിഗ്രി സെല്‍ഷ്യസായിരുന്നു. ഇന്നത് 37 ഡിഗ്രി സെല്‍ഷ്യസ് ആയി കുറഞ്ഞിട്ടുണ്ട്. വരും ദിവസങ്ങളില്‍ അന്തരീക്ഷ ഊഷ്മാവ് വലിയ തോതില്‍ കുറയും. യുഎഇയുടെ ആന്തരിക പ്രദേശങ്ങളില്‍ 17 ഡിഗ്രി സെല്‍ഷ്യസ് വരെ താപനില താഴ്‌ന്നേക്കാമെന്നും അധികൃതര്‍ അറിയിച്ചു. ഇന്ന് വെള്ളിയാഴ്ച രാവിലെയും രാജ്യത്തിന്റെ വിവിധ ഭാഗങ്ങളില്‍ കടുത്ത മൂടല്‍മഞ്ഞുള്ള അവസ്ഥയാണ് അനുഭവപ്പെട്ടത്.
ഇന്നത്തെ കാലാവസ്ഥ പൊതുവെ മിതമായതായിരിക്കുമെന്നും ചില സമയങ്ങളില്‍ ഭാഗികമായി മേഘാവൃതമായിരിക്കുമെന്നും പ്രതീക്ഷിക്കുന്നതായും കാലാവസ്ഥാ കേന്ദ്രം അറിയിച്ചു. രാത്രിയില്‍ രാജ്യത്ത് പൊതുവെ ഈര്‍പ്പമുള്ള കാലാവസ്ഥയാണ് പ്രതീക്ഷിക്കുന്നത്. വരുംദിവസങ്ങളിലും രാവിലെ സമയങ്ങളില്‍ കനത്ത മൂടല്‍ മഞ്ഞ് അനുഭവപ്പെടുമെന്നും ചില തീരപ്രദേശങ്ങളിലും ആന്തരിക പ്രദേശങ്ങളിലും മൂടല്‍മഞ്ഞ് കൂടുതല്‍ ശക്തമാവുമെന്നും കേന്ദ്രം മുന്നറിയിപ്പ് നല്‍കി. ഇതോടൊപ്പം രാജ്യത്ത് നേരിയതോ മിതമായതോ ആയ കാറ്റ് വീശാന്‍ സാധ്യതയുണ്ട്. അറേബ്യന്‍ ഗള്‍ഫിലും ഒമാന്‍ കടലിലും കടല്‍ നേരിയ തോതില്‍ പ്രക്ഷുബ്ധമായിരിക്കുമെന്നും കേന്ദ്രം അറിയിച്ചു.
