അബദ്ധത്തിൽ കിണറ്റിൽ വീണ ഭർത്താവിനെ രക്ഷിക്കാൻ കിണറ്റിലിറങ്ങി ഭാര്യ. എറണാകുളം പിറവം മുനിസിപ്പാലിറ്റിയിലെ ഇലഞ്ഞിക്കാവിലാണ് സംഭവം. വിരമിച്ച പോലീസ് ഉദ്യോഗസ്ഥനായ രമേശനാണ് കിണറ്റിൽ വീണത്.
കിണറിന് സമീപത്ത് കുരുമുളക് പറിക്കുന്നതിനിടെ മരക്കൊമ്പ് ഒടിഞ്ഞ് രമേശൻ കിണറ്റിൽ വീഴുകയായിരുന്നു. കിണറിന് ഏകദേശം 40 അടി താഴ്ചയുണ്ടായിരുന്നു. ഏകദേശം അഞ്ച് അടി വെള്ളമുണ്ടായിരുന്നു.
അപകടം കണ്ട് ഓടിയെത്തിയ ഭാര്യ പത്മം ആദ്യം പുറത്തേക്ക് കയറാൻ വേണ്ടി ഒരു പ്ലാസ്റ്റിക് കയർ എറിഞ്ഞു. പക്ഷേ വീഴ്ചയിൽ പരിക്കേറ്റ് തളർന്നുപോയതിനാൽ രമേശന് അതിൽ പിടിച്ച് കയറാനായില്ല. ഒറ്റയ്ക്ക് കയറാൻ കഴിയില്ലെന്ന് മനസിലായ ഭാര്യ അഗ്നിശമന സേനയെ വിളിക്കാൻ ബന്ധുക്കളെ അറിയിച്ചു. പിന്നെ മറ്റൊന്നും ചിന്തിക്കാതെ കിണറ്റിലേക്ക് എടുത്ത് ചാടി.
